Zbardhet ekspertiza mjeko-ligjore për vdekjen e Gjergj Tushes, 63-vjeçarit që u gjet i pajetë një ditë më parë në zonën e Lezhës.
Sipas rezultateve të ekspertizës, plaga që i shkaktoi vdekjen nuk është e shkaktuar nga armë zjarri, por nga goditje fizike. Ekspertët kanë konstatuar dëmtime të rënda dhe thyerje të brinjëve, të cilat dyshohet se janë shkaktuar nga një goditje e fortë mekanike.
Nga hetimet e deritanishme dhe dinamika e ngjarjes, dyshohet se Tushja mund të jetë goditur nga demi që ruante, pasi në brirët e kafshës janë gjetur njolla gjaku, të cilat janë dërguar për analizë ADN-je për të konfirmuar lidhjen me viktimën.
Gjithashtu, bashkëshortja e viktimës, në dëshminë e saj para grupit hetimor, ka pohuar se demi ishte kafshë problematike dhe e egër, dhe se e kishte paralajmëruar bashkëshortin për rrezikun e mundshëm.
Grupi hetimor po vijon punën për të përfunduar analizat dhe për të konfirmuar zyrtarisht nëse vdekja e 63-vjeçarit është aksidentale si pasojë e goditjes nga kafsha që ai kujdesej.
Discussion about this post