Qeveria ka miratuar vendimin, i cili përcakton shumën që do të marrin pronarët, tokat e të cilëve preken nga ndërtimi i nyjës në TEG. Vendimi është publikuar në Fletoren Zyrtare, duke hyrë kështu menjëherë në fuqi. Në të theksohet se vlera e përcaktuar në total është 64 milionë lekë, pastaj vlerësimi për secilin bëhet në bazë të sipërfaqes së prekur.
“Ky shpronësim bëhet në favor të Autoritetit Rrugor Shqiptar. Pronarët e pasurive të paluajtshme, pronë private, që shpronësohen, kompensohen në vlerë të plotë, sipas masës përkatëse që paraqitet në tabelën bashkëlidhur këtij vendimi, për pasuritë e llojit “tokë arë” “truall” dhe “ndërtesë”, me vlerë të përgjithshme prej 64 499 504 (gjashtëdhjetë e katër milionë e katërqind e nëntëdhjetë e nëntë mijë e pesëqind e katër) lekësh, vlerë e cila do të përballohet nga Autoriteti Rrugor Shqiptar”, thuhet në vendim.
Më tutje bëhet me dije se, shpenzimet procedurale, në vlerën 50. 000 lekë, përballohen nga Autoriteti Rrugor Shqiptar gjithashtu. Ndërkaq, shpërndarja e parave ka filluar dhe do të zgjasë deri në 3 muajt e ardhshëm.
Discussion about this post