Autoritetet greke kanë zbardhur vrasjen e gjashtë turqve në Lutsa.
Sipas informacioneve janë bërë dy arrestime. Fillimisht, një turk u arrestua në aeroportin Eleftherios Venizelos menjëherë pas sulmit vrasës, ndërsa një tjetër person, gjithashtu me origjinë turke, u arrestua pak ditë më parë në Greqi.
Kujtojmë se goditja mafioze me gjashtë turqit e vrarë ndodhi pasditen e së hënës së 11 shtatorit dhe fillimisht u përfol për larje hesapesh mes bandave të trafikut të drogës.
Më shumë se 20 gëzhoja të gjetura në vendin e krimit, si dhe vetë vendi i ekzekutimit, dhanë provat e para se si vrasësit lëviznin dhe sa mirë ishte i organizuar plani.
Disa javë më parë, 10 turq u arrestuan në Stamboll, të cilët dyshohet se ishin të përfshirë në masakrën.
Sipas mediave turke bëhet fjalë për anëtarët e bandës së Baris Boyun, të cilët po përgatisnin reprezalje për vrasjen e gjashtë personave në Artemisa. Arrestimet u bënë gjatë bastisjeve të policisë në shtëpi në Stamboll dhe Izmir.
Një njoftim lidhur me këtë nga Departamenti i Policisë së Stambollit thoshte se anëtarët e organizatës po përgatisnin hakmarrje në Stamboll për shkak të vrasjes së gjashtë anëtarëve të organizatës kriminale Baris Boyoun në Greqi më 11 shtator.
Gjatë kontrolleve u sekuestruan 4 pistoleta pa leje, 85 gëzhoja, 6 gramë lëndë narkotike dhe afërsisht 430 mijë lira turke.
Siç thuhet në buletinin përkatës, procedurat hetimore ndaj të dyshuarve të arrestuar po vazhdojnë.
Discussion about this post