Drejtori i Policisë së Dibrës, Artion Duka, në një konferencë për shtyp bëri publike rezultatet e operacionit policor të koduar “Bashkëfajësia”, i cili çoi në zbardhjen e plotë të vrasjes së 23-vjeçarit Renis Droba, trupi i pajetë i të cilit u gjet më 9 korrik, pranë liqenit të Ulzës.
Sipas policisë kemi të bëjmë me një vrasje të planifikuar dhe rrëmbim me pasoja fatale. Hetuesit zbuluan se më datë 8 korrik, në fshatin Zenisht të Burrelit, 23-vjeçari është rrëmbyer dhe më pas vrarë përmes mbytjes me litar nga tre vëllezërit, Kristi, Fatjon dhe Aleksandër Bushgjokaj nga Tropoja, të cilët jetonin në Kamëz dhe i dyshuari tjetër Petrit Çakrri.
“Nga hetimet e thelluara rezultoi se shtetasi R. D. është marrë peng dhe më pas është vrarë në mënyrë të dhunshme, nëpërmjet strangulimit. Më pas, autorët kanë tentuar të fshehin trupin duke e hedhur bashkë me automjetin në liqenin e Ulzës”, tha drejtori i Policisë Dibër, Artion Duka.
Policia sqaron se automjeti përfundoi në liqen, ndërsa trupi i pajetë mbeti pranë sektorit “C”, pa u zhytur në ujë. Zbulimi i trupit çoi në fillimin e një operacioni intensiv hetimor, ku u përdorën metoda speciale dhe bashkëpunim ndërinstitucional.
Pas një jave hetimesh të organizuara, policia ka arrestuar dy nga autorët e dyshuar të krimit. 55-vjeçari Petrit Çakrri (banues në Tropojë) është arrestuar në fshatin Golaj të Kukësit. Po ashtu është arrestuar në zonën e Astirit, 34-vjeçari Fatjon Bushgjokaj, banues në Kamzë.
Të dy akuzohen për “Vrasje me paramendim” në bashkëpunim dhe “Rrëmbim dhe mbajtje peng e personit”.
Ndërkohë, janë shpallur në kërkim dy djemtë e tjerë të familjes Bushgjokaj, Kristi dhe Aleksandër, të cilët dyshohen për përfshirje direkte në ngjarje.
“Kemi të bëjmë me një akt të rëndë kriminal, të kryer me paramendim dhe bashkëpunim të strukturuar. Hetimet vazhdojnë për identifikimin dhe kapjen e të gjithë të përfshirëve”, tha prokurorja Alisa Spahja.
Hetimet paraprake tregojnë se viktima Renis Dobra kishte qenë më parë i dënuar në Gjermani për shpërndarje të lëndëve narkotike, dhe kishte mosmarrëveshje të hershme me autorët e dyshuar për çështje që lidhen me veprimtari kriminale.
Policia thekson se në momentin e rrëmbimit dhe vrasjes, autorët nuk kanë përdorur uniforma ose automjete të Policisë, siç ishte pretenduar në disa rrjete sociale. Ndërkohë policia ka sekuestruar gjatë operacionit 20 telefona celularë, 7 automjete, një sasi kokaine, një shumë parash në euro dhe prova të tjera që ndihmojnë zbardhjen e plotë të çështjes.
“Hetimi ka qenë intensiv dhe profesional. Po punohet për kapjen e të kërkuarve dhe për individualizimin e përgjegjësisë së çdo personi të përfshirë”, theksoi drejtori i Policisë së Dibrës.
Sakaq, drejtoria e Forcës së Posaçme Operacionale ka shoqëruar në Komisariatin Nr. 6 në Tiranë edhe katër shtetas të tjerë, për të cilët po kryhen hetime të mëtejshme në lidhje me rastin.
Discussion about this post