Zbërtheu 6 vrasjet, i penduari Tafani pyetet sërish në Prokurori

I penduari i drejtësisë Artan Tafani pyetet sërish në prokurorinë e Elbasanit.

Tafani, një person i arrestuar për grabitjen e një pike të këmbimit valutor në Astir, ka dëshmuar për të tjera ngjarje.

Në sajë të dëshmisë së Tafanit, u zbuluan një seri krimesh, që kishin si autorë të dyshuar të tyre grupin kriminal të Laert Haxhisë.

Sipas burimeve, Tafani ka pohuar se Albi Bashaliu është vrarë në Peqin për motive gjakmarrje nga grupi i drejtuar nga Laert Haxhiu, që sipas tij u pagua me 50 mijë euro.

Ndërkohë, vëllai i Albi Bashaliut, Leonard Bashaliu akuzohet për vrasjen e Ylber Xhahysës. Duke marrë shkas nga kjo ngjarje, Enriko Xhahysa mori pjesë në krim, por edhe pagoi grupin e Laetrit për të vrarë për motive gjakmarrje.

Sakaq, Cajup Selimi është vrarë, sipas të penduarit të drejtësisë pasi kishte një lidhje intime me nënën e një prej të akuzuarve si pjesë e grupit të Laert Haxhisë.

Po ashtu mësohet se Fridman Xhaferraj dyshohet se është vrarë sepse kërcënonte grupin e Haxhiut se do t’i denonconte në polici dhe do të tregonte krimet e tyre.

Nga ana tjetër, pjesë e ngjarjeve të zbardhura janë dhe dy vrasje në Greqi, që thuhet se kanë si motiv trafikun e drogës.