Tre persona janë arrestuar nga policia, që ka zbuluar një bazë në Yzberisht të Tiranës, ku falsifikoheshin dokumente të ndryshme.
Në pranga u vu pronari i një kompanie ku kryhej falsifikimi, Çlirim Bregu – 53 vjeç, punëtori Arben Rushiti – 55 vjeç dhe një klient i arrestuar teksa tërhiqte dokumente të falsifikuara.
“Nga hetimet ka rezultuar se shtetasit Çlirim Bregu dhe Arben Rushiti, nëpërmjet vulave false të institucioneve të ndryshme shtetërore brenda dhe jashtë Shqipërisë, iu siguronin dokumente (leje qarkullimi, libreza, deklarata noteriale, dokumente shkollore dhe dëshmi të aftësive profesionale) shtetasve të ndryshëm. Ndërkaq, shtetasi F. Sh. u kap në flagrancë duke marrë një certifikatë pronësie, të dyshuar të falsifikuar”, njoftoi policia.
Në ambientet e subjektit privat, shtuan të njëjtat burime, u gjetën 210 shishe me verë, të dyshuara të kontrabanduara, si dhe u konstatua se ishin punësuar shtetas, pa u siguruar.
Burime zyrtare nga blutë saktësuar se aksioni që çoi në arrestimin e tre personave u kodua “Vula” dhe u zhvillua nga Drejtoria për Hetimin e Krimeve Ekonomiko-Financiare në Departamentin e Policisë Kriminale dhe Drejtoria e Forcës së Posaçme Operacionale, në drejtimin e Prokurorisë së Tiranës.
Sipas të dhënave në Qendrën Kombëtare të Biznesit, Çlirim Bregu rezulton pronari i subjektit “UNI – TRANS – ALBANIA” me objekt veprimtarie transportin.
Discussion about this post