Një dron është rrëzuar në oborrin e një shtëpie, në lagjen Bair në Mitrovicë gjatë ditës së sotme. Pak më parë ka reaguar dhe KFOR teksa ka konfirmuar se droni u përkiste atyre.
Sipas tyre droni ishte rrëzuar për shkak të një defekti që kishte pësuar në ajër, ndërsa bëjnë me dije se rënia e tij nuk ka shkaktuar lëndime në njerëz apo dëme material.
“KFOR konfirmon se një nga dronët e tij ra në një kopsht privat në zonën e Mitrovicës, si pasojë e mosfunksionimit. Droni nuk ka shkaktuar lëndime në njerëz apo dëme materiale dhe është tërhequr nga Forca Policore e Kosovës menjëherë pas rënies së tij”, thuhet në reagimin e KFOR-it.
Më tej KFOR tha se droni po kryente një mision rutinë monitorimi në kuadër të aktiviteteve që kanë për synim krijimin e një mjedisi të sigurte për qytetarët e Kosovës.
“Droni po kryente një mision rutinë monitorimi në mbështetje të aktiviteteve të KFOR-it, sipas Rezolutës 1244 të Këshillit të Sigurimit të Kombeve të Bashkuara të vitit 1999, duke e mandatuar KFOR-in të sigurojë një mjedis të sigurt dhe të sigurt dhe lirinë e lëvizjes për të gjitha komunitetet që jetojnë në Kosovë”, deklaroi KFOR.
Discussion about this post