Fondi Shqiptar i Zhvillimit, javën e fundit të dhjetorit ka kaluar në drejtim të Ndërmarrjes Industriale 1, shumën me vlerë 509.000.000 lekë. Ky është një nga katër transaksionet e realizuar deri tani për të mundësuar blerjen e godinës “Poli i Drejtësisë”, në bazë të Vendimit të Këshillit të Ministrave nr.356 datë 26 shkurt 2020.
“Poli i Drejtësisë” do të shërbejë si Pallat i Drejtësisë dhe vlerat transaksion janë përdorur për të blerë Shkollën e Avokatisë. Deri tani nga Fondi Shqiptar i Zhvillimit në drejtim të “Ndërmarrjes Industriale nr. 1”, kanë kaluar në total 1,499,200,000 lekë, ose rreth 15 miliardë lekë të vjetra, në 4 transaksione.
Ndërkohë, shoqëria në fjalë, “Ndërmarrja Industriale Nr.1-Tiranë” është përfolur në media se ka falimentuar. Edhe në kërkimin që ka bërë Gijotina.com në Regjistrin Kombëtar të Bizneseve (QKB), kjo shoqëri nuk rezulton që ekziston. Pra, Qeveria shqiptare nëpërmjet Fondit Shqiptar të Zhvillimit, i kalon miliarda lekë nga buxheti i shtetit dhe nga taksat e qytetarëve, një kompanie që ka falimentuar.
Historiku i blerjes së godinës fillon në vitin 2013, kur qeveria e Sali Berishës i fali Dhomës Kombëtare të Avokatisë 25 mijë metra tokë publike tek Fusha e Aviacionit. Sipas vendimit, toka shtetërore falej për të ndërtuar Korpusin e Avokatisë, pjesë e të cilit do të ishin zyrat e Dhomës Kombëtare, por edhe shkolla ku do të trajnoheshin avokatët.
Kjo ishte një kërkesë e hershme nga Bashkimi Europian dhe në vendim qeveria sanksionoi shprehimisht se Dhoma e Avokatëve e kishte të ndaluar të ndryshonte destinacionin e tokës. Dhoma e Avokatëve e ndërtoi me fondet e veta godinën duke e mbajtur sekret çmimin e ndërtimit. Por ajo nuk mund të mbante dot sekret tatimin e paguar në Bashki.
Sipas regjistrit të taksave në Bashki, taksa e ndikimit në infrastrukturë që është paguar për Korpusin e Avokatisë është 19.4 milionë lekë. Meqë kjo taksë është sa 8 për qind e vlerës së investimit, atëherë e gjithë ndërtesa ka kushtuar 232 milionë lekë ose më pak se 1.9 milionë euro.
Por pas përfundimit të godinës, dikujt në qeveri i lindi idea për të bërë biznes. Në prill të vitit 2019, qeveria ngriti një grup të posaçëm pune me përfaqësues nga disa ministri për të bërë vlerësimin e godinës dhe për të hartuar projektkontratën e blerjes. Grupi bëri vlerësimin, përgatiti projektkontratën dhe godina me vlerë 2 milionë euro e ndërtuar mbi tokë të falur shtetërore, u pagua nga taksapaguesit shqiptarë plot 12.6 milionë euro. Transaksione këto që kalojnë akoma, ndërsa shoqëria në fjalë ka falimentuar.
Gijotina.com
Discussion about this post