Trajneri i Partizanit, Zoran Zekiç, është shfaqur sot para mediave në konferencën për shtyp para sfidës së kthimit ndaj Astanës, të vlefshme për play-off të Ligës së Konferencës. Ai ka shpjeguar se ekipi do të vuajë edhe në këtë ndeshje mungesa të rëndësishme.
“Po, do ketë ndryshime taktike, por kemi disa lojtarë të dëmtuar. Do ta shohim nesër. Mehmeti dhe Mba? Shihet që ju i keni të gjithë informatat (qesh). Me shumë mundësi jo.
Astana mundet jashtë? Nëse flasim për Dinamo Zagreb e Ludogorets, janë një nivel tjetër nga Partizani në këtë moment. Nuk dua të flas shumë sot, nesër është një ndeshje tjetër ku kemi 90 minuta apo më shumë ku të luajmë me karakter, ku të jemi më të fortë dhe të luajmë me më shumë besim. Shpresoj që ekipi im të kuptojë që kjo është mundësi e madhe. Pas ndeshjes së parë vuajtëm shumë, por faleminderit Zotit ajo ndeshje përfundoi dhe nesër do të jemi shumë më mirë.
Para çdo ndeshje jam i sigurt që e kam përgatitur ndeshjen shumë mirë. Disa herë nuk është ashtu, disa herë ndodhin gjëra gjatë ndeshjes. Në ndeshjen e parë ndodhi me Grezdën dhe u desh të ndryshoja shpejt të gjithë sistemin. Për nesër padyshim kemi bërë analizën dhe kemi folur shumë dhe i kam dhënë të gjitha informacionet ekipit. Nesër nuk janë të rëndësishëm emrat dhe sistemi, janë të gjitha, por mbi të gjitha është energjia dhe nëse beson, gjithçka është e mundur. Jam i sigurt që nesër do kemi mbështetjen e tifozëve dhe nesër do të luajmë për Partizanin dhe futbollin shqiptar dhe duhet të jemi të qartë rreth kësaj dhe të jemi më të përqendruar.
Do të mundohemi të mos pësojmë por edhe të shënojmë pasi duhet të kemi më shumë mundësi për pasime të fundit e gjuajtje. Për ta bërë këtë duhet të luajmë me më shumë besim. Kur shënon në fillim i jep më shumë forcë skuadrës dhe nesër duhet të luajmë si kolektiv, si ekip.
Çdo gjë është e mundur nesër, duhet të jemi të përgatitur për gjithçka. Por mbi të gjitha të jemi të përqendruar në fillimin e ndeshjes dhe më pas të shohim se çfarë ndodh më pas. Nëse përgatitesh, ke këdo të gatshëm dhe lojtarë që ke në stol që të ofrojnë diçka kur të futen në fushë”, tha Zekiç para mediave./PanoramaSport
Discussion about this post