Presidenti i Ukrainës, Volodymyr Zelensky, është shprehur i gatshëm të marrë pjesë në samitin që pritet të mbahet në Budapest mes presidentit amerikan Donald Trump dhe presidentit rus Vladimir Putin — nëse do të marrë një ftesë zyrtare.
“Nëse ka një ftesë në një format ku takohemi si tre, ose në një format të ndërmjetëm diplomatik, ne do të jemi dakord të marrim pjesë,” tha Zelensky të hënën në një deklaratë për gazetarët.
Ndërkohë, raportime të mediave ndërkombëtare kanë zbuluar se takimi i fundit mes Zelenskyt dhe Trumpit në Shtëpinë e Bardhë ka qenë i tensionuar, duke u përshkruar si “një përballje me britma”. Sipas burimeve, pala amerikane i ka kërkuar Ukrainës të pranojë disa nga kushtet e Rusisë për t’i dhënë fund luftës.
Zelensky, në konferencën e tij të parë për shtyp pas takimit, nuk dha shumë detaje, por pranoi se mes palëve ka ende mosmarrëveshje të thella. Ai theksoi se qëllimi i tij nuk është “një paqe e shpejtë”, por “një paqe e drejtë”.
Discussion about this post