Presidenti ukrainas Volodymyr Zelenskyy ka reaguar sërish pas telefonatës së zhvilluar mes Donald Trump dhe Vladimir Putinit.
Sipas mediave të huaja, ai tha fillimisht se shpreson që Trump të zbulojë të gjitha detajet e bisedës, por shtoi se mbështet propozimin për të ndaluar goditjet në infrastrukturën energjetike ukrainase për 30 ditë.
Po ashtu Zelensky tha se Ukraina do të mbështesë çdo ide që çon në një paqe të qëndrueshme e të drejtë dhe një armëpushim pa kushte do të ishte një hap më i mirë përpara.
Ai megjithatë tha se bisedimet e ardhshme për Ukrainën pa Kievin në tryezë nuk do të sjellin rezultate.
Duke iu drejtuar ofertës ruse për lirimin e 23 ushtarëve ukrainas të plagosur rëndë, ai tha se lirimi i të gjithë të burgosurve do të ishte një mënyrë e vërtetë për Rusinë për të treguar se është serioze për bisedimet e paqes.
Mbi kërkesën e Putinit për të parë ndalimin e të gjithë ndihmave të huaja ushtarake dhe shkëmbimit të inteligjencës për Ukrainën, Zelenskyy tha se aleatët e Kievit nuk do të pajtoheshin kurrë me një veprim të tillë dhe se ai shpreson se furnizimet do të vazhdojnë.
Zelenskyy shtoi se kjo kërkesë ishte thjesht që të dobësonte Ukrainën.
Udhëheqësi ukrainas tha gjithashtu se forcat e tij kishin vlerësuar se Rusia po përgatiste ofensiva të reja në disa rajone domethënë Sumy, Kharkiv dhe Zaporizhzhia në një përpjekje për të rritur presionin ndaj Kievit.
Discussion about this post