“Pozitive, të sinqertë dhe shumë thelbësore”, e ka konsideruar presidenti ukrainas Volodymyr Zelensky, bisedën telefonike me Donald Trump. Sipas tij këtë vit mund të arrihet paqja e qëndrueshme.
“Ne ramë dakord që Ukraina dhe Shtetet e Bashkuara të vazhdojnë të punojnë së bashku për të arritur një fund real të luftës dhe paqe të qëndrueshme. Ne besojmë se së bashku me Amerikën, me presidentin Trump dhe nën udhëheqjen amerikane, mund të arrihet paqja e qëndrueshme këtë vit.”
Përfundimi i sulmeve ndaj energjisë dhe infrastrukturës tjetër civile është “një nga hapat e parë drejt përfundimit të plotë të luftës”, tha Zelensky, duke shtuar: “Unë e mbështeta këtë hap dhe Ukraina konfirmoi se ne jemi gati ta zbatojmë atë”.
Më herët presidenti Trump bëri të ditur se telefonata mes tij dhe presidenti ukrainas ishte pozitive dhe se pjesa më e madhe e diskutimit u bazua në bisedën që Trump pati me Vladimir Putin të martën.
Putin refuzoi një armëpushim të plotë gjatë asaj telefonate, por SHBA thotë se bisedimet do të vazhdojnë të dielën.
Discussion about this post