Lufta në Ukrainë është në vitin e saj të dytë dhe nuk duket se do të përfundojë së shpejti, me dy palët ndërluftuese që nuk kanë në plan që të tërhiqen nga pretendimet e tyre.
Një nga shtetet e rajonit, që po bën përpjekje për të qetësuar situatën është Turqia, që shpesh herë ka organizuar takime me të dyja palët, për të sjellë sado pak qetësi mes dy shteteve të ish-Bashkimit Sovietik.
Presidenti ukrainas Volodymyr Zelensky u takua sot në Kiev me Ministrin e Jashtëm të Turqisë, Hakan Fidan. Të dy diskutuan marrëveshjen e Detit të Zi për eksportet e grurit, nga e cila Rusia u tërhoq muajin e kaluar.
“U diskutuan shumë çështje të rëndësishme. Propozimi i Paqes për Ukrainën. Përgatitjet për Samitin Botëror të Paqes planifikuar nga Kievi dhe rreziqet e krijuara nga bllokada ruse për korridorin e Detit të Zi për eksportet e drithërave”, shkroi Zelesny në aplikacionin e mesazheve Telegram.
Marrëveshja, e ndërmjetësuar nga Turqia dhe Kombet e Bashkuara, lejoi eksportin e sigurt të grurit ukrainas përmes Detit të Zi. Pas tërheqjes së Rusisë, Ankaraja po përpiqet të bindë Moskën që t’i kthehet marrëveshjes.
Discussion about this post