Në studion e emisionit “Opinion”, Mark Marku ka dhënë versionin e tij se çfarë duhet të ndodhë me Partinë Demokratike. Sipas tij, PD duhet të racionalizoje veprimin e saj politik, sepse deri tani është në kuadër të emocionit.
Analisti Mark Marku thotë se me Sali Berishën Partia Demokratike nuk mund të vijë në pushtet. Ndërsa me Bashën thotë ai, edhe pse mundësi është shumë e vogël, mund të ndodhë.
Teksa i referohet aksionit të Sali Berishës, Mark Marku thotë se ai dhe të gjithë demokratët duhet ta kuptojnë se gjithmonë ka një fund. Për Markun, Sali Berisha duhet të ishte larguar që në vitin 2013.
“Me Berishën praktikisht a ekziston një mundësi e PD për të ardhur në pushtet? Mendoj zero. Atëherë pse po lufton të marrë PD? Me Bashën ekzistojnë pak mundësi, ose aq sa ekzistojnë mundësia për një njeri që ka humbur dy palë zgjedhje.
PD duhet të zgjedhë mes zero mundësisë dhe + zero mundësisë. Kjo është alternativa ime. Mënyra si e shikoj zgjidhjen në PD është përtej luftës së personave për pushtet. PD duhet të racionalizoje veprimin e saj politik, deri tani jemi në kuadër të emocionit.
Ata që mbështesin Berishën a do mendonin që Berisha pas 8 vitesh do kthehet në pushtet? Jo. Atëherë për çfarë lufton. Atëherë jemi në non sens politik. Në këtë kuptim unë them se demokratët ti thërrasin mendjes. Unë nuk do të doja kurrë një lider shqiptar që ta shikoja kështu. E kam për Berishën apo edhe për Ramën. Kurrë nuk doja ta shikoja në këtë gjendje” – tha Mark Marku.
