Petrit Doda, deputeti i cili zëvendësoi Alfred Rushajn në Kuvend do të regjistrohet si deputet i pavarur dhe jo si deputet i grupit parlamentar të PD.
I kontaktuar nga Balkanweb, ai shpjegoi se vendimin ia ka komunikuar edhe sekretarit të përgjithshëm të PD-së, Flamur Noka. Sipas Dodës, ky është momenti i cili reflekton për bashkim.
“Unë shkova në Parlament si deputet i opozitës, demokratët më kanë mbështetur. Ngelem deputet i opozitës, por nuk jam as vegël e Edi Ramës dhe as nuk dua të prish balancat brenda grupeve. Ato duhet të bashkohen dhe të çojmë demokratët në pushtet. Krerët i kanë punët e tyre në terezi. Ndërsa demokratët janë në rrugë të madhe, janë pa punë, pa pensione. Unë nuk dua të prish balancat.
Unë u futa në listën e kandidatëve me siglën e Legalitetit dhe vendimin e kam konsultuar edhe me Princ Lekën dhe deputetët më të vjetër. Vendimin tim ia kam komunikuar edhe Flamur Nokës. Ai ka për qëllim të bëjë riformatim. Unë nuk jam me grupin e Alibeajt, është keqinterpretuar, i kam kolegë dhe i respektoj. Unë u kam thënë “pajtohuni me demokratët të rrezojmë regjimin e Edi Ramës”, tha deputeti.
Ditën e djeshme Parti Demokratike u vendos sërish në qendër të vëmendjes pasi Enkelejd Alibeaj vendosi të përjashtojë nga grupi parlamentar katër deputetë të tjerë. Ky vendim ngjalli reagime të forta dhe te deputetët që dikur e mbështesnin duke deklaruar se kjo është një marrëzi.
Discussion about this post