Partia Demokratike nuk ka një qëndrim të qartë politik, nëse do t’i votojë në parlament ndryshimet e Kushtetutës, që parashikojnë zgjatjen e vetingut, apo do t’i refuzojë ato.
Heshtjen për këtë temë, e ka prishur Edi Rama, gjithnjë duke përmendur ambasadorët e BE dhe SHBA, që sipas tij kanë imponuar votën në parlament pro ndryshimit të Kushtetutës dhe zgjatjes së mandatit të anëtarëve të KPK deri në 2024, edhe për demokratët.
“Reforma në drejtësi është për t’u kryer dhe jo negociuar” ka thënë Rama që këtë të martë kaloi nga tonet ultimative në faktin e kryer.
Socialistët kanë parashikuar një fond të posaçëm në projekt-buxhet për Komisionin e Pavarur të Kualifikimit, i cili parashikohet të lëvrohet çdo vit deri në 2024-n. Me ligjin aktual, mandati i vettingasve përfundon qershorin e vitit 2022, por socialistët janë të sigurt se zgjatja e mandatit do të kalojë bashkë me votat e opozitës, prandaj paratë për financimin e KPK dhe KPA i kanë llogaritur deri në 2024.
Financimi për organet e vetingut deri në 2024 nuk vjen surprizë, pasi një marrëveshje e fshehtë PD-PS ka kohë që përflitet, nga ata që kërkojnë një qasje më të ashpër opozitare.
Por akti është shprehje e arrogancës në raport me opozitën, një nëpërkëmbje e deputetëve të Partisë Demokratike, të cilët ende nuk kanë diskutuar në forumet e PD-së se si do të votojnë për vetingun, ndërkohë që në Partinë Socialiste kjo konsiderohet një temë e mbyllur.
Në PD, situata është ende e paqartë pasi pozitat e Lulzim Bashës po lëkunden nga Foltorja e Berishës që thotë se ka mbledhur më shumë se gjysmat e firmave për të thirrur Kuvendin Kombëtar.
Gjatë takimit që pati më demokratët e Kavajës, Berisha, që vetë nuk është shprehur ende nëse është pro apo kundër zgjatjes së Vetingut, lëshoi një thirrje për deputetët e PD-së.
“Nuk ka ndodhur kurrë që Kuvendi të hapet me ndryshime kushtetuese. Ish-kryetari po bën marrëveshje dhe tratativa të fshehta me Ramën. U bëj thirrje të gjithë deputetëve të PD-së të refuzojnë. Refuzoni sepse Rama është i pabesë. Nuk njeh marrëveshje ai, është njësoj i pabesë si pengu që ka marrë”– tha Berisha.
Por duket se thirrja e Berishës është e vonuar. Në anën tjetër socialistët kanë nisur të ulin tonet për të krijuar një terren të çliruar nga tensionet, në mënyrë që marrëveshja të vijë sa më natyrshëm. Në këtë kontekst, fjalimi i fundit i Taulant Ballës në seancën e fundit në kuvend nuk ishte për t’u çuditur.
“Ju keni propozuar një sërë çështjesh, e mirëpresim 100%, është një e drejtë që buron nga kushtetuta, janë 28 firma deputetësh që e vënë kuvendin në punë”, u shpreh Balla me një qetësi të pazakontë drejtuar deputetëve të opozitës, votën e të cilëve tashmë socialistët mendojnë se e kanë në xhep.
