Pas braktisjes së mbledhjes për zgjatjen e organeve të Vettingut, kreu i grupit parlamentar të PD, Alfred Rushaj tha se një veprim i tillë kishte ardhur pasi nuk ishin dakordësuar me PS që të mund të bëhej votimi i projektligjit në datën 3 nëntor në tërësi, pa pasur nevojë për zgjedhjen e një trupe tjetër.
“Meqë procedura është e tillë që kërkon caktimin e ekspertëve, të relatorëve nga të dyja palët, i propozuam të bashkohen të dyja nismat pasnesër, jo pas dy muajve, por pasnesër, në mënyrë që të diskutohen siç duhet, të harmonizuara, duke pasur efektet që mund të kenë tek njëra-tjetra dispozitat e propozuara për ndryshim, si edhe duke parasysh një kalendar të punimeve të Kuvendit, të dyja nismat ishin të harmonizuara bashkë”, tha Rushaj.
Sipas deputetit demokrat, PS refuzoi kërkesën në mënyrë të çuditshme pasi kërkon konsensus nga palët, por refuzon të shtyjë mbledhjen .
“Në mënyrë tërësisht të çuditshme PS refuzoi që ta shtynte diskutimin me dy ditë që të diskutohet i gjithë ndryshimi Kushtetues. Nuk e kuptojmë këtë gjë pasi këtu po flitet për një konsensus që ka nevojë për votat e të dyja palëve, 93 – 94 vota, ndërkohë që nuk bien dakord për të shtyrë me dy ditë diskutimin e një mbledhje ku do të diskutohen këto ndryshime”, shtoi ai.
Më herët, deputetët e PD u larguan nga mbledhja pasi kërkuan shtyrjen e saj dhe marrjen në shqyrtim edhe të kërkesave të demokratëve për ndryshimeve në Kushtetutë më datë 3 nëntor.
