Në balotazhin e zgjedhjeve lokale të zhvilluara një ditë më parë në Maqedoninë e Veriut, shqiptarët kanë humbur komunën e Bërvenicës.
Sipas rezultatit, shqiptarët kanë humbur me 36 vota diferencë, këtë komunë, e cila në katër vitet e ardhshme do ta udhëheqë partia maqedonase VMRO-DPMNE me Jovica Ilievskin.
Ai fitoi përballë kandidatit shqiptar të pavarur, Enver Pajaziti. Kandidatë kishin edhe parti të tjera shqiptare, kjo për shkak se nuk arritën të kenë një ujdi për një kandidat të përbashkët për këtë komunë.
Partia opozitare, VMRO-DPMNE-ja shpalli fitoren në shumicën e komunave në balotazhin për zgjedhjet lokale që u mbajt të dielën (31 tetor) në Maqedoninë e Veriut. Sipas të dhënave nga shtabi i kësaj partie, Shkupi është fituar nga kandidatja e pavarur, Danella Arsovska, që kishte mbështetjen e VMRO DPMNE-së dhe të opozitës shqiptare.
Në daljen e parë pas zgjedhjeve lokale në vend, të cilat i vlerësoi si humbje të madhe, kryeministri Zoran Zaev njoftoi se ka dhënë dorëheqjen si kryeministër i vendit dhe si kryetar i LSDM-së.
