Maqedonia e Veriut zhvillon këtë të diel raundin e parë të zgjedhjeve vendore. Në të do të zgjidhen 80 kryetarët e rinj të komunave dhe kryebashkiaku i Shkupit. Në garë janë 303 kandidatë për kryetarë dhe 567 këshilltarë komunalë.
Që të shpallët fitues një kandidat duhet të fitojë 50% të votave. Nëse asnjë prej tyre nuk e kap këtë shifër, kalohet në votimet e raundit të dytë për atë komunë. Ku garojnë vetëm 2 kandidatët me më shumë vota. Raundi I dytë do të mbahet në 31 tetor.
Në këto zgjedhje ka dhe shumë kandidatë të pavarur si për kryetar komune ashtu dhe për këshilltarë. Të drejtën e votës e kanë rreth 1 milion e 800 mijë zgjedhës.
Fushata zgjedhore që u mbyll të premten u intensifikua në akuza ditët e fundit.
Lidhja Socialdemokrate e Maqedonisë (LSDM) e kryeministrit Zoran Zaev, drejton aktualisht 56 prej komunave. Slogani i saj është “Më e mira për komunën time”.
Opozitarja VMRO-DPMNE e Hristijan Mickoskit garon nën sloganin “Krijo të ardhme të re”. Ajo aktualisht ka drejtimin e 5 komunave. Partitë e mëdha maqedonase garojnë në koalicione parazgjedhore ndëretnike me shqiptarët. LSDM, BDI kanë përballë VMRO-DPMNE, Aleanca për Shqiptarët dhe Alternativën. Në këto zgjedhje marrin pjesë dhe 3 parti turke.
Për herë të parë do të përdoret dhe teknologjia e identifikimit të gjurmëve të gishtave. Gjithashtu, janë marrë masa të rrepta ndaj COVID-19.
