Kryetari i Partisë Agrare Ambientaliste, Agron Duka ka konfirmuar largimin nga Kuvendi pas përfundimit të kësaj legjislature, pasi përmes një deklaratë për mediat bëri me dije se nuk do të kandidojë për deputet në zgjedhjet parlamentare të 11 Majit.
Duka shprehu mirënjohjen për besimin që ka marrë nga qytetarët dhe mbështetësit gjatë karrierës së tij politike. Sipas Dukës, ky vendim ka ardhur pas një periudhe të gjatë angazhimi dhe përkushtimi ndaj interesave të qytetarëve, dhe është një hap drejt një faze të re në jetën e tij.
“Jam mirënjohës për mundësitë që kam pasur për të shërbyer si deputet, por tani është koha të jap mundësi për të rinjtë dhe të bëj hapësirë për njerëz të rinj që mund të sjellin ide të freskëta dhe energji të re. Nuk kam ndërmend të rikthehem në fushën politike si deputet. Ky është një vendim i menduar mirë dhe i thellë,” deklaroi Duka.
Duka theksoi gjithashtu se, edhe pse nuk do të kandidojë më për deputet, do të vazhdojë të mbetet i angazhuar në jetën politike të vendit, duke kontribuar në mënyra të tjera, duke u fokusuar më shumë në projekte që lidhen me zhvillimin e qëndrueshëm, forcimin e demokracisë dhe përmirësimin e kushteve të jetesës.
Discussion about this post