Tre ditë nga përfundimi i afatit të regjistrimieve të koalicioneve zgjedhore në KQZ, PD ka mbyllur negociatat me shumicën e aleatëve të saj.
Sipas burimeve, negociatat më të vështira kanë qënë me Partinë e Lirisë, pasi kjo parti kërkonte të kishte në lista të sigurta, mbi 7 deputetë. Por PD, është ndalur në 4, aq sa deputetë PL, nxorri në zgjedhjet e 2021-it. Ende nuk bëhet e ditur, se në cilat qarqe do të jenë 4 emrat e listës së mbyllur.
Sa i takon partive të tjera aleate, PAA e Agron Dukës, do të ketë një deputet në listën e mbyllur të Durrësit.
Partia Republikane e Fatmir Mediut, gjithashtu do të ketë një vend në listat e sigurta. Ajo që po diskutohet është qarku.
PBDNJ e Vangjel Dules, përsëri do të ketë një vend në listat e mbyllura të opozitës.
Sa i takon PDIU-së së Shpëtim Idrizit negociatat janë duke vijuar. Sipas burimeve, PD i ka ofruar kësaj partie vetëm një vend në listë të mbyllur, ndërsa ende nuk ka një marrëveshje mes palëve.
Lidhur me negociatat me aleatët, Berisha foli edhe këtë të premte, gjatë një konference për mediat. Duke iu përgjigjur interesit të gazetarëve, kryedemokrati u shpreh: “Negociatat janë në vazhdim me forcat e tjera politike. Nuk kam tagër të komentoj negociata në zhvillim. Negociatat janë në vazhdim dhe kur të përfundojnë do ua njoftoj. Ne jemi të hapur për negociata me të gjitha forcat politike. Edhe partitë e reja dhe uroj që, të realizojnë atë. Një koalicion për 11 majin është rruga e fitores përfundimtare të Shqipërisë dhe ne jemi të hapur ndaj tyre”.
Discussion about this post