Në qytetin e Pogradecit ka nisur zyrtarisht procesi i shpërndarjes së materialeve zgjedhore në Komisionin Zonal të Administrimit Zgjedhor nr. 70, në kuadër të zgjedhjeve të përgjithshme të 11 majit. Sipas kryetarit të KZAZ-së, Mandi Mekolli, ky proces ka filluar në orën 09:00 të mëngjesit dhe pritet të përfundojë brenda disa orëve.
Komisionerët e qendrave të votimit janë paraqitur në ambientet e KZAZ-së për të tërhequr materialet që do të shpërndahen në shtatë njësitë administrative të bashkisë Pogradec.
Një risi e këtyre zgjedhjeve është përfshirja për herë të parë në procesin e votimit e grave që vuajnë dënimin në Institucionin e Vuajtjes së Dënimit në Pojskë. Gjykata ka dhënë një vendim për lejimin e votimit të tyre, ndërsa pritet që ky vendim të komunikohet zyrtarisht pranë KZAZ-së për të mundësuar zbatimin në praktikë.
Procesi i shpërndarjes së materialeve ka nisur paralelisht edhe në bashkitë Maliq, Devoll dhe Kolonjë. Ndërkohë, në Bashkinë Korçë, materialet po shpërndahen nga KZAZ e Fshatrave, ndërsa në KZAZ e qytetit ende nuk është dhënë sinjali për nisjen e procesit.
Discussion about this post