Komisioni Qendror i Zgjedhjeve po zhvillon mbledhjen e radhës lidhur me zgjedhjet e pjesshme lokale të 6 marsit. Pjesë e mbledhjes ishin përfaqësues të PD, PS dhe LSI, ku nuk munguan as këtu përplasjet mes përfaqësuesve të Bashës dhe Berishës.
PD ka legjitimuar si përfaqësues të saj Indrit Sefën, Sekretar për çështjet ligjore e zgjedhore si edhe Marash Logun, duke ia hequr këtë përfaqësim Ivi Kasos, i shprehur hapur krah ish kryeministrit Sali Berisha.
Lidhur me këto ndryshime, Kaso u shpreh se përfaqësimi vijon automatikisht, për sa kohë jemi në periudhë ligjore, duke theksuar vendimet e 11 dhjetorit, mbledhje e thirrur nga ish kryeministri Sali Berisha.
“I bëj me dije KQZ, jemi në një periudhë zgjedhore, përfaqësimi vijon automatikisht, nuk kemi ende subjekt zgjedhor në garë. I bëj me dije KQZ për një fakt të bërë publik, edhe Kuvendi i Shqipërisë, lidhur me faktin që prej dhjetorit 2021, jo vetëm nënshkruesi i letrës nuk është më kryetar i PD, sigla dhe vula e PD, kanë ndryshuar në raport me ato të depozituara në procesin e 25 prillit”, u shpreh Kaso.
Sakaq, ndërsa shprehu keqardhje për situatën në PD, Celibashi u shpreh se kjo ishte fjala e fundit e Kasos, për këtë mbledhje duke njohur ndryshimet e PD-së zyrtarë në KQZ.
“Me gjithë keqardhjen me këtë situatë, jemi në një marrëdhënie institucionale mes KQZ dhe PD ku ai që është përfaqësuesi ligjor i saj ka konsideruar cilët do të jenë përfaqësuesit e saj në KQZ. Për ju kjo ishte fjala e fundit në lidhje me këtë problem dhe vijimin e mëtejshëm të mbledhjes së KQZ. Opinionet e PD, janë ato që do të prezantohen nga Indrit Sefa dhe Marash Logu,” u shpreh Celibashi.
Discussion about this post