Federata Italiane e Futbollit (FIGC) ka vendosur të tërheqë mbështetjen për Gianni Infantinon në zgjedhjet presidenciale të FIFA-s, që do të zhvillohen në mars 2027.
Vendimi i Italisë vjen pas disa prej iniciativave të fundit të presidentit të FIFA-s, veçanërisht planit për shitjen e të ardhurave të ardhshme nga Kupat e Botës te investitorët privatë.
Kjo ide është kundërshtuar më herët edhe nga UEFA, AFC dhe CONCACAF.
Përpara Italisë, Infantinos i kishin tërhequr mbështetjen edhe gjashtë federata nordike, si dhe Federata Shqiptare e Futbollit.
Në deklaratën zyrtare, FIGC konfirmoi se vendimi është në përputhje me qëndrimin e UEFA-s dhe presidentit të saj, Aleksander Ceferin.
“FIGC ka vendosur të tërheqë mbështetjen për kandidaturën e Gianni Infantinos”, thuhet në njoftimin e federatës.
Italia thekson se dëshiron të shprehë qartë qëndrimin e saj për mënyrën se si FIFA po planifikon menaxhimin e garave ndërkombëtare.
Presidenti i FIGC-së, Giovanni Malagò, deklaroi se futbolli duhet të bazohet te merita sportive, solidariteti dhe qëndrueshmëria.
Ai shtoi se Italia do të vijojë bashkëpunimin me UEFA-n dhe federatat e tjera evropiane për mbrojtjen e këtij modeli.
“Ne përfaqësojmë një model dialogu, respekti për mendimet e të tjerëve dhe përgjegjësie të përbashkët”, u shpreh Malagò.
Tërheqja e mbështetjes nga Italia përbën një goditje të rëndësishme për Infantinon.
Presidenti i FIFA-s synon të sigurojë një tjetër mandat në krye të institucionit më të lartë të futbollit botëror.
Por kundërshtimi i disa prej federatave të rëndësishme evropiane mund ta bëjë garën presidenciale të vitit 2027 edhe më të tensionuar.
Discussion about this post