Sot është votuar në 18 degë të Partisë Demokratike për të zgjedhur kryetarin e ri, në procesin e zgjedhjeve të thirrur nga Komisioni i Rithemelimit, i drejtuar nga Sali Berisha.
Procesi i votimit është hapur në orën 8.00 dhe u mbyll në orën 18.00 në Cërrik, Gjirokastër, Vlorë, Sarandë, Përmet, Tepelenë, Pogradec, Kukës dhe disa degë në qarkun e Tiranës si Kamzë dhe Kavajë.
Pas numërimit të fletëve të votimit, në Paskuqan u shpall fitues Anton Pjetërnikaj, një prej demokratëve i cili u shkarkua nga Lulzim Basha, pasi u vendos si përkrahës i ish-kryeministrit Berisha, në Kuvendin Kombëtar të 11 dhjetorit.
Në Tiranë, anëtarësia e degës 6 votoi Onelda Zefin si kryetare dege, në degën 10 grumbulloi më shumë vota Andi Beliu, në degën 11 fitues u shpall fitues Shkëlqen Mustafa, në degën 13 Arsen Valisi grumbulloi 61% të votave, ndërsa në degën 16 rezultatin më të lartë të votave e shënoi Eduard Rexha.
Në Tropojë rezultatin më të thellë e siguroi Besnik Dushaj me më shumë se gjysmat e votave të anëtarësisë. Në Elbasan garonin pesë emra të ndryshëm për kryesimin e Partisë Demokratike, por shumicën e votave e siguroi Blendi Himci, ndërsa në Cërrik fituese u shpall Nadire Asllani me 78% të votave.
Në Skrapar, 69% të votave të demokratëve i siguroi Hajredin Bakiasi, ndërkohë që në Kuçovë mes dy kandidaturave për kryetar dege, demokratët votuan emrin e Myslim Haxhit me 57% të votave.
Eris Shehaj u zgjodh kryetar i degës së Partisë Demokratike në Gjirokastër. Ai mori 348 vota përballë 268 votave që grumbulloi kandidati tjetër Daniel Sino. Kryetar i PD-së, dega Përmet u shpall Arson Kleanthi Lipe me 81 % të votave.
Në Tepelenë, kryetar i degës së të djathtëve u shpall Malo Hydai Sadikaj me 87% të votave. Kryetar i degës së PD-së në Memaliaj u shpall Bujar Pasho Kapllani me 87.7% të votave, ndërsa në Patos fitoi Shezaim Ymeraj me 69% të votave.
Procesi i numërimit të votave vazhdon ende në dy degët e tjera.
Discussion about this post