Me datë 17 tetor në Kosovë do të mbahen zgjedhjet lokale, duke marrë parasysh situatën e nxehtë atje ndikuar dhe nga Serbia, kryeministri Albin Kurti iu ka bërë thirrje serbëve të Kosovës që të mos i nënshtrohen presionit.
Përmes një deklarate për mediat ai tha se është shumë me rëndësi që ata të votojnë të lirë pa u ndikuar nga frika dhe presione të jashtme.
“Duke qenë në prag të zgjedhjeve lokale, është e rëndësishme që të kemi zgjedhje të lira dhe demokratike, ku secili qytetar i Republikës voton mbi bazën e bindjeve personale”, tha Kurti gjatë një takimi që zhvilloi me përfaqësuesin e posaçëm të Kombeve të Bashkuara në Kosovë, Zahir Tanin.
Në të kaluarën, misionet e Bashkimit Evropian për vëzhgimin e zgjedhjeve kanë thënë se qytetarët serbë, që nuk e kanë përkrahur Listën Serbe, janë frikësuar. Të gjitha komunat me shumicë serbe në Kosovë aktualisht udhëhiqen nga partia Lista Serbe, e cila gëzon mbështetjen e Beogradit zyrtar.
Më herët, presidenti i Serbisë, Aleksandar Vuçiq, ka thënë se të gjithë kandidatët që nuk i përkasin Listës Serbe, nuk do ta kenë përkrahjen e shtetit të tij.
Një ditë më parë, ai u ka bërë thirrje serbëve të Kosovës që të bashkohen dhe të dalin në numër sa më të madh në zgjedhje.
