Komisioni Qendror i Zgjedhjeve në Kosovë do të organizojë tërheqjen e shortit për renditjen e partive politike në fletëvotimin e zgjedhjeve lokale.
Për shkak situatës së rëndë me Covid-19, kryetari i Lidhjes Demokratike të Kosovës, Lumir Abdixhiku, kërkoi nga Lëvizja Vetëvendosje, Partia Demokratike e Kosovës dhe Aleanca për Ardhmërinë e Kosovës, që të shkurtohet fushata zgjedhore nga 30 ditë në 10 ditë.
Pro saj ishte edhe kreu i Partisë Demokratike të Kosovës, Memli Krasniqi i cili tha se duhet t’i jepet prioritet ruajtjes së shëndetit publik, ndërsa kreu i AAK-së Ramush Haradinaj kërkoi që fushata të zgjasë vetëm pesë ditë.
Javët e fundit, Kosova ka shënuar rritje të madhe të numrit të viktimave dhe rasteve të reja me koronavirus, ku vetëm në dy ditët e fundit kanë humbur jetën 56 persona. Zgjedhjet lokale do të mbahen më 17 tetor, ndërsa fushata është parashikuar të nisë më 15 shtator.
