Fredi Beleri kundërshton zgjedhjet e mbajtura më 4 gusht në Himarë dhe thotë se ligjërisht nuk ishte krijuar ende vakancë.
Beleri ka ankimuar në Komisionin e Ankimit dhe Sanksioneve vendimin e Komisionit Qendror të Zgjedhjeve i cili shpalli të pavlefshëm mandatin e tij.
Ai shprehet se skandali i zgjedhjeve në Himare shkon përtej manipulimeve dhe vjedhjeve të zakonshme.
Sipas tij, ky skandal ka kapërcyer tashmë kufijtë e ligjit dhe ka përdhosur Kushtetutën dhe Kodin Zgjedhor.
“Sipas nenit 133 të Kodit të Procedurës Administrative ankimi administrativ ndaj vendimit të KQZ pezullon ekzekutimin e tij, deri në njoftimin e vendimit të ankimit. Ankimi është paraqitur përpara datës së zgjedhjeve dhe vendimi akoma nuk është marre nga KAS dhe rrjedhimisht as është njoftuar, pra ekzekutimi i vendimit te KQZ është i pezulluar, qysh përpara zgjedhjeve dhe akoma aktualisht”, shkruan Beleri në një reagim në rrjetet sociale.
“Në këto kushte, mandati i Fredi Belerit nuk është ende i pavlefshëm ligjërisht sado e pabesueshme mund të tingëllojë dhe as sjell efekte vendimmarrja për ndërprerjen e parakohshme të këtij mandati. Ligjërisht nuk ka ende vakancë, por zgjedhjet u zhvilluan, duke u zgjedhur tjetër kryetar bashkie. Ky precedent sa i pabesueshëm dhe aq antiligjor e antikushtetues është prova më e madhe që zgjedhje të lira nuk ka më dhe me këtë regjim, nuk ka shpresë të ndodhin”, shton ai.
“Një fazë e re e opozitarizmit duhet të ngjizet sa më shpejt… Mosbindje dhe përbuzje për hajdutët e votave. Lajmi i mirë i vetëm është që kalaja e Himarës, e Lukovës, e Nivicës dhe Dhërmiu nuk janë mposhtur akoma! Burrat e Himarës nuk janë gjunjëzuar ende”, përfundon Beleri.
Discussion about this post