Nëntë kandidatë për kryetarë komunash në Kosovë, që do të garojnë në zgjedhjet e 17 tetorit rezultojnë me probleme me ligjin. Kjo është deklaruar nga Instituti i Kosovës për Drejtësi, i cili ka publikuar raportin “Integriteti i kandidatëve për Kryetarë të Komunave – Analizë e kandidatëve për Kryetar të Komunave që kanë probleme me ligjin”.
“Sipas partive politike, IKD ka gjetur se partitë politikë, të cilat kanë kandiduar më së shumti persona, të cilët kanë probleme me ligjin janë AAK dhe PDK me nga tre kandidatë, pasuar nga LVV me dy kandidatë dhe NISMA me një kandidat. IKD nuk ka identifikuar ndonjë kandidat nga radhët e LDK-së që ka probleme me ligjin”, thuhet në raportin e IKD-së. Në këtë analizë, nuk janë përfshirë kandidatët të cilët kanë pasur aktakuza, por që më pas janë liruar nga akuza me vendime gjyqësore të formës së prerë.
Pas këtij raporti reagoi Lidhja Demokratike e Kosovës, e cila dënoi përfshirjen e personave me rekorde kriminale në listat për kandidatë. “Nëntë prej kandidatëve për kryetarë të komunave, të cilët pritet të garojnë në zgjedhjet lokale që do të mbahen më 17 tetor të këtij viti, kanë probleme me ligjin. Nuk na vjen mirë për një gjë të tillë, por kjo është e vërteta. Po ashtu, e vërtetë është se asnjëri prej tyre nuk është nga Lidhja Demokratike e Kosovës”, u shpreh në reagimin e saj LDK.
