Zgjedhjet në Kosovë, LDK del partia më e votuar

Lidhja Demokratike e Kosovës (LDK) ka dalë e para për nga numri i votave në zgjedhjet e 17 tetorit për kuvendet komunale në Kosovë.

Kjo parti ka shënuar një rikthim krahasuar me rezultatin në zgjedhjet parlamentare që u mbajtën rreth 8 muaj më parë, më 14 shkurt 2021.

Në zgjedhjet parlamentare të shkurtit, LDK-ja kishte fituar mbi 12 për qind të votave, ndërsa Lëvizja Vetëvendosje kishte fituar mbi 50 për qind të votave.

Sipas të dhënave nga Komisioni Qendror i Zgjedhjeve (KQZ) në lidhje me zgjedhjet për kuvendet komunale, LDK-ja ka dalë e para me mbi 170 mijë vota pasuar nga Lëvizja Vetëvendosje me mbi 168 mijë vota.

E treta, sipas këtyre rezultateve, renditet Partia Demokratike e Kosovës (PDK) me mbi 161 mijë vota, ndërsa Aleanca për Ardhmërinë e Kosovës(AAK) ishte e katërta për nga numri i votave me mbi 90 mijë sosh.

Pas shpalljes së këtyre rezultateve zgjedhore, partitë dhe individët kanë të drejtë ankese në Panelin Zgjedhor për Ankesa dhe Parashtesa.

LDK ka grumbulluar 170 mijë e 134 vota

LVV ka 168 mijë e 84 vota

PDK ka 161 mijë e 645 vota

AAK ka 90 mijë e 863 vota

Lista Serbe 53 mijë e 342 vota

Kujtojmë në raundin e dytë nuk do të ketë votime për asamble komunale, derisa për kryetarë të komunave do të votohet në 21 komuna.