Në lidhje me zgjedhjet lokale të cilat po mbahen në Kosovë, bëhet me dije se pjesëmarrja në votime deri në orën 15:10 është 27%. E thënë ndryshe, deri më tani kanë votuar 456 mijë e 247 qytetarë.
Komuna me pjesëmarrjen më të madhe aktualisht është ajo e Zveçanit me 56.9 %.
Raportohet se procesi ka ecur mirë, ka pasur disa probleme të vogla të cilat janë zgjidhur.
Kosova sot në zgjedhje lokale! Qytetarët votojnë për përfaqësuesit e tyre në komuna
Qytetarët e Kosovës votojnë sot për të zgjedhur përfaqësuesit e tyre lokal, asamblistët dhe kryetarët e 38 komunave. Qendrat e votimit hapen në ora 07:00 dhe mbyllen në ora 19:00, ndërsa në këto zgjedhje janë 166 kandidatë për postin e kryetarëve të komunave, 152 burra dhe 14 gra.
Numri i kandidatëve për kuvende komunale është 5,198, prej tyre 3,261 burra dhe 1,937 gra. Numri i përgjithshëm i kandidatëve të certifikuar është 5,364.
Lista përfundimtare e votuesve për Zgjedhjet Lokale 2021, e cila do të shpërndahet në vendvotime, përmban 1 milion e 885 mijë e 448 emra të votuesve, apo 90 mijë e 586 votues më shumë në krahasim me zgjedhjet e parakohshme për Kuvendin e Kosovës që u mbajtën më 14 shkurt 2021. Numri i qendrave të votimit në të gjithë Republikën e Kosovës është 883 me gjithsej 2 mijë e 477 vendvotime.
Komisionerët dhe vëzhguesit e zgjedhjeve do të duhet të jenë të vaksinuar apo të kenë dëshminë se janë negativë në koronavirus apo se e kanë kaluar sëmundjen. Komisioni Qendror i Zgjedhjeve u ka kërkuar partive politike që të zbatojnë këtë masë. Por, ky rregull nuk do të vlejë edhe për votuesit, konfirmojnë nga Komisioni Qendror i Zgjedhjeve (KQZ). Qytetarëve do t’iu kërkohet të mbajnë maska mbrojtëse dhe distancë fizike.
Atyre nuk do t’u kërkohet dëshmia se janë vaksinuar apo testet për COVID-19. Masa të tilla do të ketë edhe për vëzhguesit dhe stafin zgjedhor. Këta do të jenë të detyruar që mbikëqyrjen e procesit zgjedhor ta bëjnë duke ofruar një nga dëshmitë.
Zgjedhjet do të monitorohen nga mijëra vëzhgues të vendit si dhe Bashkimi Evropian ka dërguar një mision për vëzhgimin e zgjedhjeve lokale.
