Zgjedhjet në Kukës, Basha provokon me emrin e kreut të degës

Në 24 shtator do të mbahen zgjedhjet e pjesshme vendore për Kryebashkiak të Kukësit, pas largimit të Safet Gjicit, i cili ndodhet në paraburgim pas publikimit të një video-skandali.

E ndërsa socialistët e Kryeministrit Edi Rama duket se kanë caktuar si kandidat të tyre Albert Halilajn, ish-drejtor i Tatimeve në Kukës, i emëruar së fundi prefekt i Qarkut, opozita e drejtuar nga Sali Berisha ende nuk ka caktuar një kandidaturë.

Një ditë më parë, Berisha deklaroi se do të zhvillojë konsultime me aleatët, por nuk dha ndonjë emër preferencial.

Ilir Meta, i cili në 14 maj ishte pjesë e koalicionit të drejtuar nga Berisha, tha se do të mbështesë çdo emër që do të caktohet nga Rithemelimi.

Ndërkohë, PD e Lulzim Bashës, duket se ka provokuar me emrin e Arif Rexhmatit, i cili drejton strukturat e PD-së zyrtare në Kukës.

Përmes një deklarate kërkohet që kandidatura e Rexhmatit të mbështetet nga të gjithë faktorët opozitarë, në mënyrë që qytetarëve kuksianë ti kthehet besimi, por edhe PD të kthehet në një alternativë qeverisëse.

Sipas degës së PD-së Kukës, në 24 shtator opozita duhet të dalë me një kandidat të vetëm.

Deklarata në fjalë ka gjetur mbështetjen e deputetes Jorida Tabaku, e cila përmes një postimi në rrjetet sociale shkruan se të kërkosh që opozita të jetë e bashkuar nuk të bën as të shitur dhe as të blerë diku, thjesht tregon përgjegjshmëri politike përballë qytetarëve.

“Partia Demokratike Dega Kukes është treguar largëpamëse edhe përbashkuese duke kërkuar vetëm një kandidat të së djathtës në zgjedhjet e parakohshme për bashkinë Kukës!

Të kërkosh që opozita të jetë e bashkuar nuk të bën as të shitur dhe as të blerë diku, thjesht tregon përgjegjshmëri politike përballë qytetarëve. Për demokratët ajo do të thotë oferta më e mirë opozitare dhe jo një opozitë me copa!

Që në shtator 2022 kam kërkuar përgjegjshmëri dhe kam diskutuar mundësinë për të menduar për qytetarët dhe jo për ofiqarët. Kjo mund të arrijë vetëm duke qenë një alternativë!

Sot, këtë na e kërkojnë edhe njerëzit! Gabimet e së shkuarës duhet të na bëjnë të mësojmë! Degradimi i qeverisjes lokale sidomos asaj në Kukës është një mundësi reale për një kandidat që përfaqëson më së miri vlerat e së djathtës”, shkruan Tabaku.