Do të jem një shërbëtor i qytetarëve dhe jo një kryebashkiak aga apo gangster. Kështu iu drejtua qytetarëve të Kukësit kandidati i “Bashkë Fitojmë” Emri Vata, në krah të të cilit ditën e sotme është shfaqur Sali Berisha dhe grupimi i deputetëve të drejtuar prej tij dhe Gazment Bardhit.
Vata tha se do të përcjellë te qytetarët kuksianë zërin e Sali Berishës.
“Unë përcjell në Kukës zërin e Sali Berishës. Dhe Berisha ka dhënë një premtim që do të heqë taksën në doganë. Kjo është një barrë e shtuar për biznesin në doganë.
Ne flasim për gjëra të vogla por kanë rëndësi të madhe. Kukësi nuk është i varfër por është i vjedhur.
Unë garantoj një gjë që do jem jo kryebashkiaku gangster, jo kryebashkiaku aga, apo pasha por do të jem kryebashkiaku shërbëtor i juaji dhe automatikisht gjithë stafi juaj do të jetë në shërbimin tuaja, si partner për biznesin dhe si shërbëtor për komunitetin”, tha Vata.
Emri Vata do të kandidojë në Bashkinë e Kukësit nën logon e “Bashkë Fitojmë”. Zgjedhjet e pjesshme në Bashkinë e Kukësit mbahen më 24 shtator, ndërsa përballë Vatës kandidon Albert Halilaj, i mbështetur nga Partia Socialiste. Zgjedhjet e pjesshme në Kukës mbahen për shkak se ish-kryebashkiaku Safet Gjici, i cili ndodhet në paraburgim pas publikimit të një video-skandali në zyrën e tij, u shkarkua me vendim të Qeverisë, pas presionit të opinionit publik.
Discussion about this post