Sot në Mal të Zi u zhvilluan zgjedhjet presidenciale dhe qendrat e votimit ishin të hapura nga ora 07:00 deri në 20:00 të mbrëmjes.
Pak pas mbylljes së qendrave të votimit, Qendra për Tranzicionin Demokratik (CDT) ka publikuar shifrat ekzakte të pjesëmarrjes, që deri në mbrëmje ishte 63.6% ose rreth 344.700 votues, rreth 12.5% më pak se në zgjedhjet e vitit 2020.
Ndërkohë, sipas parashikimeve paraprake të rezultateve, të publikuara nga CeMI, kandidati për president i DPS-së Milo Gjukanoviç ka arritur të fitojë 36.6% të votave, bazuar në 46.2 përqind të mostrës së përpunuar.
Në zgjedhjet më të rëndësishme në vitet e fundit në Mal të Zi, sipas rezultateve të para, do të duhet edhe një raund i dytë pasi askush nuk ka arritur që të fitojë mbi 50% të votave.
Rivali i Gjukanoviç, kandidati i Lëvizjes “Evropa Tani”, Jakov Milatoviç fitoi 26,8%, “Fronti Demokratik” me Andrija Mandiç 20% të votave dhe partia “Mali i Zi Demokratik” me Aleksa Beçiç candidate ka arritur të marrë 11,7% të votave.
Sakaq, kandidatja e SDPA-së Draginja Vuksanović Stanković fitoi 2.8 përqind, kandidati për Malin e Zi të Bashkuar Goran Danilović 1.3 përqind dhe influencuesi Jovan Radulović Jodžir 0.8 përqind.
Kujtojmë se nëse asnjë kandidat nuk merr numrin e duhur të votave, raundi i dytë i zgjedhjeve do të mbahet brenda 14 ditësh, pra më 2 prill.
Në raundin e dytë marrin pjesë dy kandidatët që kanë fituar numrin më të madh të votave.
Analistët kishin paralajmëruar se emri i fituesit do të bëhet i ditur në balotazhin që mund të mbahet më 2 prill, nëse të dielën asnjëri prej kandidatëve nuk fiton mbi 50 për qind të votave.
Discussion about this post