Gazment Bardhi, i cili mban funksionin e Sekretarit të Përgjithshëm të PD-së zyrtare, u shpreh sot se është i vendosur të zbatojë deri në fund statutin e kësaj partie mbi proceset e brendshme zgjedhore.
Bardhi tha se pavarësisht se një grup personash po tentojnë të marrin kompetencat dhe funksionet e Sekretarit të Përgjithshëm, ato po ecin në procese anti-staturore.
I pyetur mbi një largim të mundshëm të Saimir Korreshit nga drejtimi i degës së Lushnjes, Bardhi tha se nuk është në dijeni të një informacioni të tillë.
“Unë nuk di pse është zëvendësuar njëri apo tjetri, nuk kam firmosur asnjë vendim dhe nuk do firmos asnjë vendim që bie ndesh me statutin. Unë nuk do të jap detaje të zbatimit të statutit. Nuk kam dijeni për një propozim të tillë. Organizimi i PD-së është përgjegjësi e sekretarit të përgjithshëm. Mesa duket një grup kanë vendosur të ushtrojnë kompetencat e sekretarit të Përgjithshëm. Unë do të zbatoj statutin e PD-së. Çdokush tjetër që ka vendosur të ecë përpara në procese anti statutore bën zgjedhjet e tij. Pa statut dhe pa rregulla nuk mund të ketë bashkëjetesë”, u shpreh Bardhi për gazetarët.
Gazment Bardhi dhe deputetë të tjerë demokratë të PD-së së vulës si Saimir Korreshi, Lefter Geshtenja, Bledion Nallbati, Helidon Bushati, etj, kundërshtuan vendimin e marrë nga kryesia e partisë për zhvillimin e zgjedhjeve për kryetar më 29 Korrik.
Discussion about this post