Ditën e diel, 23 korrik, mbahen zgjedhjet e pjesshme vendore për Bashkinë e Rrogozhinës, ku qytetarët do të zgjedhin kryebashkiakun e ri.
Ripërsëritja e zgjedhjeve erdhi pasi Kolegji Zgjedhor pranoi pjesërisht kërkesën e opozitës, e cila argumentoi manipulimin zgjedhor, veccanërisht me votat e burgut.
Policia është angazhuar në ruajtjen e të gjitha objekteve zgjedhore me qëllim mbarvajtjen e procesit.
Secili punonjës policie është njohur dhe trajnuar për detyrat që ka në këtë fazë dhe deri në përfundim të procesit, si dhe është pajisur me librin e xhepit për detyrat funksionale gjatë procesit zgjedhor.
Në Drejtorinë Vendore të Policisë Durrës dhe në Komisariatin e Policisë Kavajë, janë ngritur Grupet e Drejtimit për mbarëvajtjen e procesit zgjedhor si dhe menaxhimin e çdo lloj situate bazuar në planin e veçantë të masave.
Ndërkohë ka filluar funksionimi i aplikacionit “Monitorimi elektronik i shërbimeve të Policisë së Shtetit”, i cili shfaq në kohë reale raportimet e strukturave në terren për sigurimin e rendit publik dhe të objekteve zgjedhore, gjatë procesit të votimit në territorin e Rrogozhinës.
“Policia garanton qytetarët e Rrogozhinës së ka ndërmarrë të gjitha masat, që e drejta e tyre kushtetuese për zgjedhjen e përfaqësuesve të pushtetit lokal, të ushtrohet e lirë, e qetë, e pacenuar dhe pa intimiduar prej askujt”– thuhet në njoftimin e Policisë së Shtetit.
Discussion about this post