Republikanët projektohen të rimarrin kontrollin e Senatit të SHBA-së, pasi fituan vende në Senat në Virxhinian Perëndimore dhe Ohio. Rezultatet e parashikuara e shohin Senatin në një ndarje 51-49 në favor të republikanëve. Jim Justice, guvernatori aktual i Virxhinias Perëndimore, parashikohet të fitojë vendin e lënë nga ish-demokrati Joe Manchin, ndërsa Bernie Moreno në Ohio rrëzoi nga detyra demokratin Sherrod Brown. Në Dhomën e Përfaqësuesve, republikanët deri tani janë në avantazh – megjithëse disa gara janë ende të pavendosura.
Nëse Partia Republikane kontrollon Dhomën, Senatin dhe Shtëpinë e Bardhë, sicc eshte projektohet, ajo do të ketë fuqi të gjerë për të kaluar ligje dhe zbatuar axhendën e presidentit tw ardhshwm Donald Trump. Republikanët fituan për herë të fundit shumicën në Senat në vitin 2018. Në Ohio, Brown parashikohej të humbiste ndaj Morenos, një emigrant kolumbian dhe ish-magnat i shitjeve të makinave, i cili e portretizoi politikanin veteran si “tepër liberal për Ohion”. Gara u quajt më e shtrenjta në historinë e zgjedhjeve për Senat në SHBA. Brown u tha mbështetësve se rezultati ishte një “zhgënjim, por jo një dështim”, duke shtuar: “Nuk do të heq dorë nga lufta jonë për punëtorët dhe e di që as ju nuk do të dorëzoheni”.
Vendi në Virxhinia Perëndimore pritet të kalojë republikan. Ai u kontestua pas daljes në pension të Manchin, i cili shpesh përplasej me anëtarët e partisë së tij përpara se të kalonte si i pavarur. Justice vetë kishte qenë demokrat përpara se të kalonte në republikan në një tubim të Trump në 2017. Një total prej 34 vendesh në Senat ishin në garë të martën.
Në Teksas, aleati i Trump, Ted Cruz, përballoi një sfidë të fuqishme nga ish-lojtari i NFL Colin Allred për të fituar një mandat të tretë. Demokratët ndërmorën një përpjekje të përqendruar për të mundur Cruzin, por partia nuk ka fituar një zgjedhje në nivel shtetëror në Teksas për më shumë se 30 vjet. Republikanët gjithashtu ruajtën vendin e Nebraskës për Deb Fischer, pas sfidës surprizë nga mekaniku i makinave Dan Osborn, një i pavarur i regjistruar.
Rezultati në Senat menjëherë ndezi diskutime mbi atë që do ta zëvendësojë senatorin e Kentakit, Mitch McConnell, për t’u bërë Lider i Shumicës së Senatit në sesionin e ardhshëm legjislativ. McConnell, 82 vjeç, njoftoi më herët këtë vit se do të tërhiqej nga roli. Rick Scott, një republikan nga Florida, që ruajti vendin e tij përballë sfidës së ish-përfaqësueses Debbie Mucarsel-Powell, një demokrate e ardhur nga Ekuadori që fëmijë, parashikoi drejt se republikanët do të merrnin shumicën në Senat, duke shtuar se ai do të zgjidhej si Lider i Shumicës në Senat.
“Florida është qendra e Partisë Republikane të këtij vendi,” tha ai para turmës. “Uashingtoni mund të mësojë shumë nga ajo që kemi bërë këtu në këtë shtet të madh.” Demokratët ruajtën një vend në Delaware, një shtet që presidenti Joe Biden e përfaqësoi si senator për 36 vjet, me një fitore për kongresisten e katërt Lisa Blunt Rochester. Në Maryland, demokratët mbajtën një vend të lënë nga Ben Cardin, me Angela Alsobrooks që mposhti guvernatorin popullor republikan Larry Hogan. Ato do të bëhen gratë e para zezake që përfaqësojnë shtetet e tyre përkatëse.
Në New Jersey, demokratët ruajtën një vend të lënë nga Bob Menendez, i cili dha dorëheqjen pasi u shpall fajtor për marrjen e ryshfeteve për favore politike. Andy Kim, 42 vjeç, do të bëhet senatori i parë korean-amerikan në histori. Në Kaliforni, përfaqësuesi Adam Schiff, që udhëhoqi hetimin e parë kundër Trump, ruajti një vend të mbajtur nga senatorja demokrate e ndjerë Dianne Feinstein.
Gara të tjera që mund të kishin ndikuar në kontrollin e Senatit u zhvilluan në Arizona, Pennsylvania, Montana, Michigan, Nevada, Nebraska dhe Wisconsin.
Të dyja partitë po përpiqen gjithashtu të kontrollojnë Dhomën, megjithëse balanca e fuqisë atje nuk do të dihet për disa ditë.
Shumica e zgjedhjeve të Dhomës po zhvillohen në “rajonet e sigurta” – rajone ku njëra parti është pothuajse e sigurt për të fituar. Por disa gara të tjera në distrikte të pavendosura mund të përcaktojnë se kush kontrollon Washington DC.
Garat për Dhomën që mund të ndikojnë në balancën po zhvillohen në një gamë të gjerë shtetesh, me zgjedhje që po ndiqen me kujdes në Kaliforni, New York, Washington, Maine dhe Alaska.
/Përshtatur nga BBC/
Discussion about this post