Ish-deputeti demokrat Dashnor Sula ka deklaruar se opozita ka vetëm një shans për të fituar zgjedhjet e pjesshme për Bashkinë e Tiranës: kandidimin e Sali Berishës.
Në një intervistë për A2 CNN, Sula u shpreh se Berisha është figura përbashkuese e së djathtës dhe kandidati i vetëm që mund të garantojë fitoren ndaj Ogerta Manastirliut, e cila pritet të jetë përfaqësuesja e socialistëve në këtë garë.
“Sali Berisha është kandidati ideal për të mundur Manastirliun dhe PS në Bashkinë e Tiranës. Është një figurë tradicionale e së djathtës, që ngjall shpresë te demokratët dhe mund të kthejë energjinë e opozitës për zgjedhjet e ardhshme parlamentare. Nëse Berisha futet në garë, ai është i sigurt që fiton”, tha Sula.
Sipas tij, kandidatura e Berishës do të bashkonte të gjitha strukturat e opozitës dhe do të përbënte “valvulën e shkarkimit” të krizës dhe pasivitetit në Partinë Demokratike.
Duke iu referuar qëndrimit të Agron Shehajt, i cili ka kërkuar një kandidat jopolitik, Sula u shpreh se shumica e demokratëve do të mbështesnin Berishën. “Unë mendoj se nuk ka gjasa që Shehaj ta kundërshtojë. Humbja është e sigurt me një kandidat tjetër”, theksoi ai.
Discussion about this post