Kryeministri i Kosovës, Albin Kurti deklaroi se nuk do të ketë dorëheqje të kryetarëve në katër komunat në veri të Kosovës për mbajtjen e zgjedhjeve të parakohshme.
Për organizimin e tyre, ai shtoi se duhet të ndiqen procedurat që parasheh Ligji për Vetëqeverisje Lokale. Po ashtu, shefi i ekzekutivit tha se nuk mund të imponojë garimin në zgjedhje të Listës Serbe.
Kurti foli edhe për marrëveshjen për shtensionim, ku tha se pas dy javëve të qeta në veri, janë dakorduar për zvogëlim të pranisë së policisë.
“Në dy javët e fundit, nuk ka as protesta të dhunshme dhe as incidente. Duke pasur parasysh që në katër komunat në veri të Kosovës nuk ka as protesta të dhunshme dhe as incidente në dy javët që shkuan, ne kemi thënë që është e dobishme të bëjmë një zvogëlim, një reduktim për 25 për qind të pranisë së Policisë në ndërtesa dhe në rrethinat e tyre, si gjest i vullnetit të mirë nga ana e Kosovës. Në anën tjetër, ju e dini që ka pasur arrestime si asnjëherë më parë në veri të Kosovës, kundër ekstremistëve të dhunshëm, kundër grupeve kriminale ilegale dhe sundimi i ligjit vazhdon edhe më tej. Nuk është diçka që përfundon”, deklaroi Kurti. Shefi i ekzekutivit theksoi se marrëveshja nuk përcakton largimin e njësiteve policore, sepse këtë e bën Policia e Kosovës. “Njësitë policore nuk janë duke u zvogëluar, është duke u zvogëluar prania e policisë. Marrëveshja jonë nuk është për largim të kësaj apo të asaj njësie, sepse këto janë vendime të brendshme të Policisë së Kosovës, e cila ka kryer trajnime profesionale dhe ku politika nuk përzihet dot. As kemi vullnet dhe as kemi interes për një gjë të tillë. Ne çfarë kemi dakorduar në Bratisllavë dje, pas konsultimeve edhe me Policinë e Kosovës është se pas këtyre dy javëve, dukshëm më të qeta dhe më të sigurta në veri të Kosovës, mund të zvogëlojmë praninë e policisë, pra numrin e gjithmbarshëm për 25 për qind”, theksoi ai para gazetarëve.
Sa i përket zgjedhjeve të parakohshme në veri, Kurti shtoi se duhet të ndiqen procedurat siç e parasheh ligji në Kosovë.
Po ashtu, shtoi se nuk do të ketë dorëheqje të katër kryetarëve.
“Dorëheqja është një akt individual moral, pra nuk e thotë dikush në vend të dikujt tjetër. Kur e thotë dikush në vend të dikujt tjetër, mund të jetë shkarkim. Por dorëheqja është dorëheqje e dikujt të veçantë, të cilën duhet ta pyesni. Nuk do të ketë dorëheqje, por do të ketë neni 72 të Ligjit për Vetëqeverisje Lokale”, shtoi ai.
Kurti deklaroi se nuk mund të imponojë garimin e partive politike dhe se ligji duhet të jetë mbi politikën.
“Unë si kryeministër i Kosovës duhet të krijojë kushtet për zgjedhje të lira, demokratike e ferr, që paraprihen nga një fushatë para zgjedhore, e cila ua mundëson të gjithëve të garojnë pa frikë, të votojnë pa kërcënime dhe unë e dua pluralizimin politik. Cila parti garon e cila parti nuk garon, unë nuk imponoj dot. Mirëpo, ne duhet të krijojmë kushtet që ata që duan të garojnë ta kenë një mundësi të tillë. Kjo nënkupton që ligji duhet të jetë mbi politikën në mënyrë që të kemi demokraci. Partitë politike janë aty, veçse ligji është mbi ato, përfshirë edhe mua si kryetar parti edhe si kryeministër”, përfundoi ai.
Të hënën në Bratislavë, është arritur marrëveshja ndërmjet zëvendëskryeministrit të Kosovës, Besnik Bislimi dhe emisarit të BE-së, Miroslav Lajçak për shtensionimin e situatës.
Discussion about this post