Sekretari për Çështjet Ligjore në PD-në zyrtare, Indrit Sefa, u shpreh se deri në orën 14:00 kanë marrë pjesë 11600 votues ose 44 % e anëtarëve të kësaj partie, në procesin që po mbahet për zgjedhjen mes Lulzim Bashës dhe Gjergj hanit për kreun e kësaj partie.
Në një proces pothuajse të kontestuar tërësisht dhe me një fshirje të rreth 50 mijë anëtarëve nga listat e atyre që kanë të drejtë vote, Basha pritet të marrë drejtimin e PD-së së vulës, edhe pse shumica e deputetëve dhe Sekretari i Përgjithshëm, Gazment Bardhi, si dhe Këshilli Kombëtar, janë kundra zgjedhjes së sotme.
Gjithsesi kjo nuk ka penguar mbështetësit e Lulzim Bashës që të organizojnë procesin, ta monitorojnë, madje të raportojnë edhe shifrat mbi pjesëmarrjen.
“Deri në orën 14:00 kanë qenë 11600 votues që përkon me 44% të anëtarëve të PD në atë moment. Procesi ka qenë normal, të rregullt e shumë të qytetëruar. U shprehim falënderimet. Në bazë të vendimit të Kryesisë dhe të rregullores kemi përcaktuar edhe ata që se kanë emrin në listat e përgatitura. Këta anëtarë ja paraqisnin komisionin kartën e anëtarësisë dhe kalohet në një listë të posaçme. Pjesëmarrja është brenda pritshmërive duke patur parasysh periudhën kur zhvillohen këto zgjedhje”, tha Sefa.
Discussion about this post