Kryeministri Edi Rama ka vijuar me turin për zgjedhjen e drejtuesve të rinj të degëve të Partisë Socialiste në 61 bashkitë e vendit. Ditën e sotme, Rama ishte në Peshkopi, ku theksoi ndër të tjera rëndësinë se kjo forcë politike ka nevojë për energji të reja.
“PS është një trup që ka nevojë të rrite vazhdimisht. Ka nevojë vazhdimisht për gjak të ri, për energji të reja. Ne edhe këtë herë e kemi filluar menjëherë pas zgjedhjeve të shkuara. U ulëm për të lexuar rezultatin. Nuk është e rastësishme që këtë herë procesi i zgjedhjeve në parti është ndryshe. Ka një risi, si rezultat i një analize dhe debati të brendshëm. Është e rëndësishme që ta fuqizojmë cilësinë e jetës në PS. Të rrisim shkallën e përgjegjësisë në anëtarësi”, tha Rama.
Kreu i qeverisë tha se në zgjedhjet e 25 prillit nuk morën rezultat të mirë në Dibër, duke mos arritur objektivin. Ai u kërkoi socialistëve që të mësojnë nga gabimet, ndërsa theksoi se në zgjedhjet e ardhshme lokale duhet të punojnë që të rikonfirmojnë kryebashkiakun aktual.
“Kudo ku organizatat janë të bashkëdrejtuara, rezultatet janë më të mira, po mos të kishte gra, në një qendër votimi, në një zonë, aty nuk do të kishte as parti, ishte një situatë shurdhe, shyqyr që janë gratë që dhe burrat e mbajnë veten, justifikimi që nuk ka gra është komplet kot. Sa më shumë burrat bëjnë si të fortë, aq më shumë drejtohen nga gratë. Në zgjedhjet e fundit të përgjithshme në Dibër nuk e kemi arritur objektivin tonë, një nga të paktat qarqe, mirëpo patëm një rizgjim shumë pozitiv në zgjedhjet e pjesshme, ku u pa qartë se kur ju doni, nuk ka asgjë që ju pengon për të arritur objektivin. Në rast se ju nuk merreni me njëri tjetrin, se dibranët njihen se ja hyjnë njëri-tjetrit, jam i bindur që ne në zgjedhjet e ardhshme duhet të konfirmojmë kreun e bashkisë, që ju e keni pritur shumë mirë”, u shpreh Rama.
Discussion about this post