Rusia ka nisur sot votimet e parakohshme në territoret ukrainase që ka marrë në kontrollin e saj, si pjesë e zgjedhjeve që do të mbahen në disa rajone të Rusisë më 10 shtator, njoftoi agjencia shtetërore ruse e lajmeve TASS.
Moska zotëron pak më pak se 20% të territorit ukrainas: Krimenë, të cilën e aneksoi në 2014, si dhe pjesën më të madhe të Oblastit të Luhanskut dhe pjesë të Donetsk, Zaporizhia dhe Kherson.
Zgjedhjet në këto zona, të cilat Ukraina i ka dënuar, do të mbahen më 10 shtator, por autoritetet pushtuese kanë filluar votimet nga sot në rajonet e Donetsk dhe Zaporizhia dhe nga 2 shtatori në ato të Kherson dhe Luhansk.
Pavarësisht sanksioneve të shumta perëndimore, Rusia shpalli aneksimin e këtyre territoreve në shtator 2022 pas procedurave që Moska i përshkroi si “referendume”. Komuniteti ndërkombëtar nuk i ka njohur rezultatet e tyre.
Shumë rajone ruse do të votojnë gjithashtu më 10 shtator për të zgjedhur guvernatorët, deputetët rajonalë apo edhe këshilltarët e qytetit.
Praktikisht nuk ka asnjë opozitë në këto zgjedhje, pasi autoritetet ruse janë angazhuar në një fushatë për të heshtur çdo zë kritik, veçanërisht ata që kritikojnë pushtimin e Ukrainës.
Figurat më të shquara të opozitës në vend janë ose në burg ose jetojnë në mërgim të vetë-imponuar në vende të tjera.
Discussion about this post