Të Mërkurën u publikuan listat e kandidatëve për deputetë nga secila parti politike. Ndalur te kjo, kryeministri Edi Rama nuk kurseu ironitë, duke vënë theksin te lista e mbyllur e Partisë Demokratike për Tiranën. “Tribuna VIP e kënetës! Doni të shihni kush janë VIP-at e kënetës, shihni skuadrën në listën e mbyllur të kryeqytetit të Shqipërisë madhështore, ku mungon Kujtim Gjuzi.”
Pati një koment edhe për “zhvendosjen” politike të deputetit Dashnor Sula, nga PD te koalicioni mes Nismës Thurrje dhe Shqipëria Bëhet.
“I madhi Dash Sula që nuk ka lënë gjë pa bërë për ta kapur një vend, u la në det të hapur. Dhe mesa unë mora vesh, u arratis, nuk e përballoi dot këtë poshtërim, por vazhdon të besojë se Shqipëria Bëhet. Në fund të ditës është gjel deti i Peqinit dhe nuk pajtohet dot këneta me të, ato puplat e mëdha, është tip i veçantë në llojin e vet. Gjel deti, por i veçantë!”
Ndërsa për skuadrën e tij me të cilën garon më 11 Maj, tha se janë selektuar me shumë kujdes.
“Ne kështu e kemi sistemin, bëhet puna studimore të territorit, potencialeve dhe bashkëpunojmë me komunitetet, partinë, aktorë e faktorë të shoqërisë për të kuptuar se cilat janë kandidaturat më të përshtatshme. Kemi rilançuar platformën “Deputeti që duam”, e bëmë provën në 2021, nxorrëm disa mësime, bëmë disa përmirësime dhe patëm rreth 500 e kusur aplikime.“
Discussion about this post