Kryetarja e Komisionit të Çështjeve Europiane dhe deputetja e PD-së, Jorida Tabaku, ka deklaruar se zgjedhjet e 11 majit përbëjnë një mundësi të humbur për Shqipërinë dhe një dështim për demokracinë, në një moment kyç për integrimin europian të vendit.
Gjatë mbledhjes së parë të Komisionit pas zgjedhjeve, Tabaku theksoi se ky proces zgjedhor, i pari pas hapjes së negociatave me Bashkimin Europian, duhet të kishte qenë një provë e sjelljes ndryshe nga klasa politike dhe e forcimit të standardeve demokratike.
Tabaku thekson se raporti paraprak i OSBE/ODIHR evidentoi presionin mbi administratën, përdorimin e burimeve shtetërore dhe lidhjen e ngushtë mes shtetit dhe partisë në pushtet.
Sipas Tabakut, në vend që të tregonim përparim, vendi bëri hapa pas teksa shprehet se “nuk ka rëndësi sa kapituj apo grupkapituj hapen në negociata; rëndësi ka përmirësimi i standardeve dhe respektimi i demokracisë në praktikë”.
Më tej, Tabaku theksoi se për Shqipërinë nuk ka rrugë tjetër përveç rrugës europiane, por kjo rrugë kërkon standard, reformë reale dhe vullnet politik për t’u përmirësuar.
Discussion about this post