Lulzim Basha, kreu i asaj që njihet si PD zyrtare, ka mbajtur një qëndrim të prerë lidhur me reformën zgjedhore, ndërsa akuzoi Kryeministrin Edi Rama se nuk do reformë, ndaj dhe vijon teatrin me regjinë e tij.
Basha konsideron Teatër debatet lidhur me përfaqësimin e opozitës në Komisionin e Reformës Zgjedhore, ku rreth 50 deputetë opozitarë, i kërkojnë Lindita Nikollës, kryetare e Parlamentit, që të nisë procesin e zëvendësimit të anëtarëve që i takojnë opozitës, bazuar në propozimin që mban firmën e Gazment Bardhit.
Ai u shpreh se debati këtë javë ka qenë “ik Enkelejd, hajde Oerd”, gjë që sipas tij nuk është në interes të publikut.
“Teatri me regji të Edi Ramës pamundësoi mbledhjen fizike të Komisionit të Reformës Zgjedhore. Thirrja ime është të lihen alibitë e të mundësohet funksionimi normal i këtij komisioni. Duhet barazi vote. Kush merr më shumë vota të bëhet deputet. Votim e numërim elektronik dhe vota e diasporës. Debati këtë javë ka qenë ik Enkelejd, hajde Oerd. Kjo është në interes të atyre që nuk e duan këtë. Nuk mendohet për interesin publik. Nuk duhet të humbasim kohë me qurravitje për interesa të vogla. Të enjten u është bërë dëm qindra e mijëra familjeve shqiptare me votimin e 11 ligjeve përmes rrëmujës”, u shpreh ai.
Discussion about this post