Belind Këlliçi, ish-deputet dhe anëtar i Kryesisë së PD-së që drejtohet nga Sali Berisha, deklaroi mbrëmjen e sotme se deri të premten, ditë kur pritet të mblidhet Komisioni i Posaçëm për Reformën Zgjedhore, do të ketë zhvillime të rëndësishme.
Nga studio e emisionit “Open”, Këlliçi tha se është i bindur që do të ketë zhvillime që nuk do të lejojnë që reformën zgjedhore ta bëjë Edi Rama me Lulzim Bashën, që i shërben atij.
“Do ketë zhvillime, jam i bindur për këtë. Nuk do lejohet që reformën ta bëjë Damian Gjiknuri dhe Enkelejd Alibeaj, ndërkohë që nuk respektohet vullneti i shumicës së demokratëve, shumicës së deputetëve të PD-së, që kanë mandatuar Oerd Bylykbashin si bashkëkryetar i Komisionit”, tha Këlliçi.
Sipas tij, sot Oerd Bylykbashi është propozim i 500 mijë shqiptarëve.
“Deri të premten ku është njoftuar mbledhja e parë do të ketë zhvillime. Që reformë me Enkelejdin dhe Damianin nuk do të ketë. Këtë ua garantoj. Që nuk do të ketë komision të reformës fasadë që t’i shërbejë Edi Ramës, këtë ta siguroj. Është e pamundur që 500 mijë shqiptarë të lihen jashtë këtij procesi dhe të bëhet një pseudoreformë”, tha Këlliçi.
Nuk dihet nëse ish-deputeti në paralajmërimin e tij ka parasysh vijimin e aksionit opozitar, duke bllokuar mbledhjen e parë të Komisionit të Posaçëm për Reformën Zgjedhore, apo do të gjenden modalitete për të kryer zëvendësimin e Alibeajt, mbështetës i Lulzim Bashës, me të mandatuarin e Grupit Parlamentar të PD-së, Oerd Bylykbashin.
Discussion about this post