Skandalet me mikrokeditë në vendin tonë janë një problem alarmant, të denoncuar prej kohësh nga persona të ndryshëm, të cilët kanë shkuar deri në vetëvrasje pasi nuk ka marrë zgjidhje pas rënies pre e mashtrimeve nga personazhe e banka të ndryshme.
Kësaj radhe bëhet fjalë për një skemë mashtrimi të ngritur nga 33-vjeçarja Donika Curri, e arrestuar në qershor të këtij viti, pasi kishte mashtruar 23 gra nga fshati Zejmen në Lezhë, duke u marrë kartat e identitetit, e më pas kishte aplikuar për kredi në emër të tyre në aplikacionin online IUTE Credit, me vlerë nga 3 mijë deri në 5 mijë euro.
Donika Curri prezantohej si përfaqësuese e një shoqate bamirësie për nëna me fëmijë të mitur, duke u kërkuar viktimave fotokopje të kartës së identitetit me premtimin e ndihmës mujore.
Aktivitetin e paligjshëm, Curri mesa duket nuk e ka ushtruar vetëm në Lezhë, por gjithashtu dhe në Tiranë. Nga burime policore, Sky Web ka mësuar se ka qenë një 25-vjeçare, e afërme e Donika Currit, e cila ka denoncuar në polici rastin e mashtrimit nga 33-vjeçarja. 25-vjeçarja rezulton si kreditore në bankën IUTE Credit për shumën 3 500 euro, kredi kjo e aprovuar dhe e disbursuar.
Këto para të marra nga kreditë e aplikuara nga Donika Curri, derdheshin më pas në një llogari bankare nën menaxhimin e saj. Në këtë skemë kriminale dyshohet që të jetë gjithashtu të përfshirë dhe punonjës të këtij institucioni financiar, ndërsa autoritetet tashmë kanë nisur hetimet për zbardhjen e plotë të ngjarjes.
Procedura për aplikimin online në aplikacionin IUTE Credit kërkon të dhënat e kartës së identitetit dhe një foto live të personit në fjalë. Nuk është ende e qartë sesi Donika Curri arrinte të siguronte dhe fotot e personave të mashtruar, duke thelluar paligjshmërinë deri në shkelje të kushteve të identifikimit në distancë.
Në momentin që ky skandal shpërtheu gjerësisht në media, IUTE Credit reagoi për Sky Web duke u distancuar plotësisht nga rasti në fjalë, teksa kanë pohuar se janë viktima finale e këtij kalvari mashtrimi dhe se nuk ishin në dijeni të kësaj skeme.
“Iute Albania është viktima finale e këtij kalvari gënjeshtrash dhe keqpërdorimi besimi që personi i identifikuar në media, ka kryer. Menjëherë sapo jemi informuar nga qytetarët, skuadrat tona ligjore kanë kallëzuar penalisht rastin dhe janë pezulluar kreditë e klientëve deri në një vendim final të hetimeve policore. Këtu gjejmë rastin të shprehim mirënjohjen tonë për strukturat e Policisë së Shtetit, të cilat kanë vepruar në kohë të shpejtë dhe vendimtare“, tha IUTE Albania për Skyweb.al.
Njoftimi i policisë në Qershor:
Iu merrte foto të kartës së identitetit, shtetaseve, duke i mashtruar se ishte përfaqësuese e një shoqate bamirësie, dhe me të dhënat e tyre merrte kredi, vihet në pranga 33-vjeçarja. Arrestimi i saj, rezultat i administrimit të shpejtë të 16 kallëzimeve për këtë skemë mashtrimi. Sekuestrohen dokumente bankare.
Specialistët për Hetimin e Krimeve Ekonomike dhe Financiare, si rezultat i administrimit të kallëzimit të disa shtetaseve, për një shtetase që iu kishte marrë të dhënat personale, nëpërmjet mashtrimit, duke u prezantuar si përfaqësuese e një shoqate bamirësie, finalizuan operacionin policor të koduar “Kredia”. Në kuadër të operacionit u arrestua shtetasja D. C., 33 vjeçe, banuese në Tiranë.
Discussion about this post