Këtë të premte është hedhur shorti në Presidencë për zgjedhjen e anëtarëve të Këshillit të Emërimeve në Drejtësi, i cili do të funksionojë përgjatë vitit 2022.
Në KED u zgjodhën 2 anëtarë nga Gjykata Kushtetuese, 1 përfaqësuesi i Gjykatës së Lartë, 1 përfaqësues i Prokurorisë së Përgjithshme, 2 përfaqësues nga Gjykatat e Apelit, 2 përfaqësues të Prokurorive të Apelit dhe 1 përfaqësues nga Gjykatat Administrative.
Nga 9 kandidatë të Gjykatës së Lartë shorti ka përzgjedhur Sokol Binaj si anëtar të Këshillit të Emërimeve në Drejtësi, ku sipas ligjit Binaj do të jetë edhe kryetari i ri i KED. Ndërkohë që Sandër Simoni është anëtari zëvendësues.
Marsida Xhaferllari dhe Elsa Toska u zgjodhën përfaqësuesit e Gjykatës Kushtetuese në Këshillin e Emërimeve në Drejtësi. Ndërsa anëtari zëvendës i Kushtetueses në KED është zgjedhur Altin Binaj.
Nga 9 kandidatë të Prokurorisë së Përgjithshme, Anila Leka është përzgjedhur nga goglat si anëtare të Këshillit të Emërimeve në Drejtësi, ndërsa Thoma Jano është anëtari zëvendësues i këtij institucioni.
23 ishin kandidatët e gjykatave të Apelit në vend të cilët plotësonin kushtet për të qenë anëtarë të Këshillit të Emërimeve në Drejtësi për vitin 2022, nga të cilët u zgjodhën dy. Edlira Petri dhe Enton Dhimitri janë anëtarët, ndërsa Ridvan Hado është zëvendësuesi.
Arta Marku zgjidhet në Këshillin e Emërimeve në Drejtësi si përfaqësues i prokurorive të Apelit. Anëtari tjetër i këtij institucioni është Etjen Kapo. Ndërsa anëtari zëvendësues është Genti Xholi.
Klodiana Mema do të jetë anëtarja e 9 në Këshillin e Emërimeve në Drejtësi si përfaqësues i Gjykatave Administrative. Anëtari zëvendësues është Erarbër Madhi.
Këshilli i Emërimeve në Drejtësi është një organ kolegjial, i përbërë nga 9 anëtarë me një mandat 1 vjeçar, dhe është përgjegjës për vlerësimin e kritereve profesionale e morale të kandidatëve për anëtarë të Gjykatës Kushtetuese dhe për Inspektor të Lartë të Drejtësisë.
Discussion about this post