Në mënyrë që presidenti amerikan, Joe Biden të hipë më lehtë në Air Force One, avioni presidencial po ndërron shkallët. Gjatë dy viteve të fundit, imazhet dhe videot kanë bërë xhiron e presidentit 80-vjeçar të SHBA-së duke u rrëzuar teksa ngjitej shkallët e avionit presidencial.
Zyrtarët në Shtëpinë e Bardhë menduan se diçka duhej bërë, por pa e konfirmuar zyrtarisht. Që tani e tutje, Joe Biden do të përdorë shkallën më të vogël të palosshme në Air Force One për ta bërë më të lehtë hipjen e tij në bord.
Politico raportoi të mërkurën se dy këshilltarë të Biden pranuan se përdorimi i shkallës më të vogël të palosshme ishte bërë qëllimisht për ta bërë më të lehtë për presidentin të hipte, duke minimizuar shanset që ai të rrokulliset përsëri para kamerave. Presidentët amerikanë, siç shkruan gazeta britanike “Daily Mail”, kanë mundësi të përdorin një shkallë me rrota – e cila ka 26 shkallë ose një më të vogël të palosshme me 14 shkallë. Megjithatë, me shkallët më të larta, Biden bën një hyrje më madhështore kur arrin në destinacione të ndryshme.
Gjatë dy viteve të fundit, presidenti demokrat i Shtëpisë së Bardhë është penguar disa herë në shkallët e Air Force One, duke nxitur thashethemet se shëndeti i tij është i brishtë, ndërsa ai tashmë ka njoftuar se do të kërkojë rizgjedhjen në postin që mban.
Discussion about this post