Ashtu sic pritej, Këshilli Bashkiak i Himarës zgjodhi këtë të premte Arqile Bollanon si kryetarin e ri të komanduar të bashkisë, me 12 vota pro dhe 9 kundër. Ai vjen në këtë post pas dorëheqjes së Blerina Balës dy ditë më parë. Bollano ishte në garë me Pervin Gjikuria, i cili gjatë mbledhjes së sotme deklaroi tërheqjen nga gara.
Më 29 mars, Blerina Bala u zgjodh kryetare e komanduar për Himarën nga Këshilli Bashkiak pasi dy kryetarët, ai në detyrë Jorgo Goro dhe i zgjedhuri Fedi Beleri përfunduan në burg. Më herët gjatë javës, pëmes një letre dorëheqje, ajo shprehej se detyrën po e linte për “për arsye personale që kërkojnë kohën dhe vëmendjen e saj të plotë.”
Ndërkohë, në media është raportuar për një përplasje mes Balës dhe Ramës, teksa ky i fundi vizitoi Himarën pak javë më parë.
Himara pritet të shkojë drejt zgjedhjeve të reja vetëm pas një vendimi përfundimtar i Apelit të Posaçëm për Fredi Belerin, i dënuar me dy vite burg nga GJKKO për blerje votash në zgjedhjet vendorë të 14 majit 2023. Ky i fundit akuzon për gjyq politik dhe shprehet se Rama po e mban pas hekurave për shkak të interesave ekonomike në Himarë.
Probleme me drejtësinë ka edhe kryetari i ri i komanduar i bashkisë Bollano, i cili është kallëzuar në SPAK nga Fredi Beleri vitin e kaluar bashkë me ish-kryetarin Jorgo Goro dhe zyrtarë të tjerë të bashkisë. Kallëzimi u bë për vepraat penale “Shpërdorim i detyrës”, “Shkelja e barazisë së pjesëmarrësve në tendera apo ankande publike” dhe u bazua në njëaudit të kryer nga Kontrolli i Lartë i Shtetit për periudhën nga data 01.10.2019 deri më 31.05.2021.
“Kam konstatuar se ky raport ka evidentuar një numër të madh të shkeljes së ligjeve prej drejtuesve të Bashkisë Himarë që vijojnë të jenë në detyrë si edhe specialistëve dhe punonjësve të ndryshëm që konsistojnë veçanërisht në procedurat e tenderimeve publike, mosmbledhjes së të ardhurave, mospasqyrimit të drejtë të të ardhurave dhe debive në buxhetin e bashkisë dhe në dhënien e lejeve të ndërtimit në kundërshtim me ligjin apo mos marrjen e masave për ndëshkimin e shkeljeve të mëparshme për subjekte të caktuar që kanë ndërtuar pa leje apo kanë detyrime financiare ndaj bashkisë Himarë”, shprehej Beleri në kallëzim.
Pas votimit, Bollano tha për mediat se tani ka përgjegjësi të madhe.
“Falenderoj Këshillin Bashkiak për bashkimin që ka. Do mundohem të jem sa më shumë bashkëpunues. Edhe me ata që nuk më votuan. I jam mirënjohës atyre. Unë jam vazhdimësi e bashkisë dhe kemi rrugë për të bërë. Nuk ka nevojë për llafe, ka nevojë vetëm për punë. Që kushdo që të vijë në Himarë të ndjehet i kënaqur. Pavarësisht kundërshtimeve unë vij me një përgjegjësi të madhe“, tha Bollano.
I pyetur nëse edhe ai do të dorëhiqet si paraardhësja Bala, ai u përgjigj: Nuk mund të parashikoj nëse do të dorëhiqem njësoj si paraardhësja ime.
Lexo edhe:
“Servil, dështak, hajdut”, Beleri reagon nga burgu pas zgjedhjes së kryebashkiakut të ri të Himarës
Discussion about this post